'राधे' चित्रपटाच्या शूटिंगला ग्रीन सिग्नल, 'या' तारखेला होणार सुरुवात

सलमान खानच्या राधे या आगामी चित्रपटाच्या शूटिंगची तारीख निश्चित करण्यात आली आहे. कोरोनाच्या पार्श्वभूमीवर बरेच महिने हे शूटिंग थांबले होते. सुरक्षेच्या सर्व उपाययोजना आखत या चित्रपटाचे शूटिंग अखेर मुंबईबाहेर एनडी स्टुडिओत पार पडणार आहे.

मुंबई - बॉलिवूडचा दबंग अभिनेता सलमान खान सध्या बिग बॉस १४च्या शूटिंगमध्ये व्यग्र आहे. लवकरच तो प्रेक्षकांच्या मनोरंजनासाठी सिनेमाच्या शूटिंगलाही सुरूवात करीत आहे. सलमान आपल्या आगामी 'राधे' सिनेमाचे शूटिंग २ ऑक्टोबरपासून सुरू करीत आहे. कर्जतच्या एनडी स्टुडिओमध्ये हे शूटिंग चालू होईल.

'राधे' चित्रपटाचे शूटिंग १५ दिवस एनडी स्टुडिओत चालणार आहे. त्यानंतर त्याचे पॅचवर्कचे काम मुंबईच्या मेहबूब स्टुडिओत पार पडेल. सरकारने घालून दिलेल्या सर्व नियमांचे यावेळी पालन करण्यात येणार आहे. सर्व कलाकार आणि क्रू मेंबर्स यांच्या सुरक्षेचा विचार करुन शूटिंग होईल.

शूटिंगसाठी कलाकार आणि तंत्रज्ञ यांना लांबून प्रवास करावा लागू नये, यासाठी कर्जतच्या जवळचे हॉटेल बुक करण्यात आले आहे. यात सहभागी होणाऱ्या लोकांना इतर लोकांशी भेटण्यास टाळण्याचा सक्त निर्देश देण्यात आले आहेत. सूत्राने दिलेल्या माहितीनुसार सर्वांची कोविड चाचणी करण्यात आली आहे. यात कोणाचीही चाचणी पॉझिटिव्ह आलेली नाही. सेटवर सुरक्षेचे सर्व काळजी घेतली जाणार असून अॅम्ब्युलन्ससह डॉक्टरांची टीमही सेटवर हजर असणार आहे.

'राधे' चित्रपटाची निर्मिती सलमानचा भाऊ सोहेल खान आणि मेव्हणा अतुल अग्निहोत्री करीत आहेत.