मुंबई - सुप्रसिद्ध फॅशन डिझायनर स्वप्निल शिंदे याने सोशल मीडियाच्या माध्यमातून आपल्या लिंगाबद्दल मोठी घोषणा केली आहे. शिंदे याने इन्स्टाग्रामवर हा खुलासा केला की तो 'गे' पुरुष नाही तर ट्रान्सवुमन आहे. त्याने सायशा हे आपले नवीन नावही निवडले आहे. इन्स्टाग्रामवर तिने आपली स्वप्निल शिंदे हे नाव बदलून सायशा असे ठेवले असून तिचा नवीन वर्षातील सुंदर स्त्री लूकही शेअर केला आहे.
दिग्गज अभिनेत्रींचा स्वप्निल होता फॅशन डिझायनर
शिंदेने बॉलिवूडच्या सर्व ए-लिस्टरबरोबर काम केले आहे. दीपिका पादुकोण, कियारा अडवाणी, करीना कपूर खान, माधुरी दीक्षित-नेने आणि सनी लिओनी सारख्या बर्‍याच दिग्गज अभिनेत्रींना त्याने आपल्या कलाकृतींनी सजवले आहे.
स्वप्निल बनला सायशा
मंगळवारी शिंदे यांनी सोशल मीडियावर आपण ट्रान्सवुमन म्हणून बाहेर येत असल्याची घोषणा केली आणि सायशा शिंदे अशी आपली एक नवी ओळख असल्याचा खुलासा केला. "सायशा म्हणजे अर्थपूर्ण जीवन आणि मी माझे जीवन एक अपवादात्मक अर्थपूर्ण बनवण्याची योजना आखत आहे," असं तिच्या इंस्टाग्राम पोस्टवर कॅप्शन म्हणून तिने लिहिलं आहे.
पोस्टमध्ये तिने पुढे लिहिले आहे की, "आपल्या उत्पत्तीची पर्वा न करता, नेहमीच आपल्या बालपणीची आठवण करून देणाऱ्या काहीतरी गोष्टी असतात. यातून मी एकटेपणाकडे ढकलले गेले, दबाव वाढला आणि प्रत्येक क्षणी संभ्रमाच्या अराजकतेकडे गेले."