मुंबई - पंतप्रधान नरेंद्र मोदी यांनी काल देशाला उद्देशून केलेल्या भाषणामध्ये २० लाख कोटी रुपयांच्या पॅकेजची घोषणा केली होती. यानंतर बॉलिवूड सेलेब्रिटींच्या प्रतिक्रिया येणे स्वाभाविक होते आणि तशाच त्या आल्याही. अनुपम खेर, शाहिद कपूर, अनुराग कश्यप यांनी दिलेल्या प्रतिक्रियामुळे बॉलिवूडमध्ये दोन गट पडल्याचे दिसत आहे.
मोदी यांनी २० लाख कोटी रुपयांच्या पॅकेजची नवी घोषणा केली. यामुळे भारतीय अर्थव्यवस्था संकटातून बाहेर पडेल असा दावा करण्यात आला असून आत्मनिर्भर होण्याचा मार्ग चोखाळण्याचे आवाहन पंतप्रधानांनी आपल्या भाषणात केले होते.
अभिनेता अनुपम खेर यांनी पंतप्रधान मोदी यांच्या विचारांचे स्वागत करीत आपले विचार शेअर करताना लिहिलंय, "जेव्हा भारताचे पंतप्रधान नरेंद्र मोदी बोलतात तेव्हा केवळ देशच नाही तर संपूर्ण जग ऐकते आणि प्रेरणा घेते. जर सर्व 1.30 अब्ज भारतीयांनी स्वावलंबनाच्या मार्गाचे अनुसरण केले तर नक्कीच आम्हाला यश येईल."