मुंबई - गेली काही दिवस युकेमध्ये 'बेल बॉटम' या चित्रपटाच्या शूटिंगसाठी अक्षय कुमार गेला होता. तो भारतात परतण्यास निघाला आहे. आपल्या चाहत्यांना ही बातमी देण्यासाठी त्याने सोशल मीडियावर एक फोटो शेअर केलाय.
अक्षय कुमारने आपल्या ट्विटमध्ये लिहिलंय, "मिशन पूर्ण झाले ! दीर्घकाळानंतर अखेर शूटिंग यशस्वी पार पडले. महामारीच्या काळात बेल बॉटमचे शूट झाले. आता परतीची वेळ झालीय.# जेटसेटगो"
अक्षय कुमारने विमानतळावरील फोटो शेअर केलाय. यात त्याच्यासोबत सहकलाकार वाणी कपूर दिसत आहे. ग्लसगो, स्कॉटलँडमध्ये बेल बॉटमचे शूटिंग सुरू होते.
अक्षयच्या ट्विटवर अभिनेत्री हुमा कुरेशी हिने आपली प्रतिक्रिया दिली आहे. "गरम कपडे घालून तयारीत राहण्याचा शेवटचा दिवस... आता आपल्या देशाला परत येतोय." तिने लिहिलंय.
रणजित एम. तिवारी दिग्दर्शित, 'बेल बॉटम'मध्ये अक्षय कुमारसह वाणी कपूर, हुमा कुरेशी आणि लारा दत्ता या अभिनेत्रींच्या प्रमुख भूमिका आहेत. हा स्पाय थ्रिलर चित्रपट 2 एप्रिल 2021 रोजी प्रदर्शित होणार आहे.