मुंबई - मिस्टर परफेक्शनिस्ट आमिर खान आणि दाक्षिणात्य स्टार अल्लू अर्जुन एकमेकांसमोर भिडणार आहेत. आमिरचा बहुप्रतीक्षित 'लाल सिंग चढ्ढा' आणि अल्लू अर्जुनचा 'पुष्पा भाग 1' हा चित्रपट यंदाच्या ख्रिसमसला एकाच वेळी रिलीज होणार आहेत.
आमिर खानचा 'लाल सिंग चढ्ढा' हा सिनेमा ख्रिसमस 2021 ला रिलीज होणार हे फार पूर्वीच ठरले आहे. मात्र आता पॅन इंडिया स्टार अल्लू अर्जुनचा 'पुष्पा भाग 1' हा आगामी सिनेमादेखील यंदाच्या ख्रिसमसलाच रिलीज होणार असल्याची घोषणा करण्यात आली आहे.
'मिस्टर परफेक्शनिस्ट' आमिर खानचा 2018 मध्ये 'ठग्स ऑफ हिन्दोस्तान' हा चित्रपट बॉक्स ऑफिसवर आपटला होता. हा चित्रपट फ्लॉप ठरल्यानंतर आमिर एका मोठ्या हिट चित्रपटाच्या प्रतिक्षेत आहे. लवकरच तो 'लाल सिंग चढ्ढा' या चित्रपटात मुख्य भूमिकेत झळकणार आहे. हा चित्रपट हॉलिवूडच्या 'फॉरेस्ट गंप'चा हिंदी रिमेक आहे.