नवी दिल्ली : पंतप्रधान नरेंद्र मोदी यांच्या अमेरिका भेटीदरम्यान, भारत आणि अमेरिकेने आर्थिक व राजनैतिक संबंध मजबूत करण्यासाठी संरक्षण, तंत्रज्ञान, मायक्रोचिप आणि व्हिसा नूतनीकरण यासह अनेक करारांची घोषणा केली. जनरल इलेक्ट्रिक (GE) आणि हिंदुस्तान एरोनॉटिक्स लिमिटेड (HAL) यांच्यात MQ9-रीपर ड्रोन आणि भारतात GE 414 जेट इंजिनच्या सह-उत्पादनासाठी कराराची घोषणा करण्यात आली आहे.
संरक्षण क्षेत्र - भारताला मिळणार प्रीडेटर ड्रोन :जनरल अ‍ॅटॉमिक्सने बनवलेल्या MQ-9B सीगार्डियन ड्रोनच्या डीलवर मोदी आणि बायडन यांच्यात चर्चा झाली. यानंतर जनरल अ‍ॅटॉमिक्स MQ-9 रीपर ड्रोन डील जाहीर करण्यात आली. भारत तीस MQ-9B प्रीडेटर ड्रोन खरेदी करणार आहे. नौदलाला 14 ड्रोन, तर हवाई दल आणि लष्कराला 8-8 ड्रोन मिळतील. या ड्रोनच्या अधिग्रहणामुळे भारताची टेहळणी यंत्रणा अधिक मजबूत होणार आहे.
देशात लढाऊ जेट इंजिन बनवले जातील :जनरल इलेक्ट्रिकने सांगितले की, त्यांनी संरक्षण आणि तंत्रज्ञान सुधारण्याच्या प्रयत्नांचा एक भाग म्हणून तेजस लाइट कॉम्बॅट एअरक्राफ्टसाठी इंजिन बनवण्यासाठी भारतीय कंपनी हिंदुस्तान एरोनॉटिक्स लिमिटेड सोबत करार केला आहे. म्हणजेच भारताच्या हातात आता जेट इंजिन बनवण्याचे तंत्रज्ञान येणार आहे. त्यामुळे भारत देशातच जेट इंजिन बनवू शकणार आहे.
अंतराळ क्षेत्र - आर्टेमिस करारावर स्वाक्षरी : भारताने आर्टेमिस करारावर स्वाक्षरी केली आहे. आता भारत शांततापूर्ण आणि पारदर्शक सहकार्यासाठी वचनबद्ध असलेल्या इतर 26 देशांमध्ये सामील झाला आहे, ज्यामुळे चंद्र, मंगळ आणि त्यापलीकडे शोध घेणे शक्य होईल. 2024 मध्ये आंतरराष्ट्रीय अंतराळ स्थानकासाठी संयुक्त प्रयत्न सुरू करण्याच्या उद्देशाने NASA भारतीय अंतराळ संशोधन संस्था (ISRO) अंतराळवीरांना प्रगत प्रशिक्षण प्रदान करेल. मायक्रोन टेक्नॉलॉजी ही अमेरिकन मेमरी चिप कंपनी गुजरातमध्ये नवीन चिप असेंब्ली आणि चाचणी सुविधेत गुंतवणूक करणार आहे. यातून थेट पाच हजार रोजगार निर्माण होतील.
अमेरिका दोन दूतावास उघडणार : दोन्ही देशांमधील राजनैतिक संबंध अधिक विकसित करण्यासाठी पावले उचलण्यात आली आहेत. व्हाईट हाऊसच्या एका वरिष्ठ अधिकाऱ्याने सांगितले की, दोन्ही देशांमधील संपर्क अधिक वाढवण्यासाठी अमेरिका भारतात दोन वाणिज्य दूतावास उघडणार आहे. एक वाणिज्य दूतावास बंगळुरूमध्ये तर दुसरा अहमदाबादमध्ये उघडला जाईल.
व्हिसा नियम शिथिल : यूएस प्रशासनाच्या एका वरिष्ठ अधिकाऱ्याने सांगितले की, अमेरिका नूतनीकरणयोग्य H-1B व्हिसा सादर करणार आहे. यामुळे हजारो भारतीय व्यावसायिकांना अमेरिकेत राहण्यास आणि काम करण्यास मदत होईल. त्यांना त्यांच्या 'वर्क व्हिसा'च्या नूतनीकरणासाठी घरी परत जावे लागणार नाही. H-1B व्हिसा हा एक स्थलांतरित व्हिसा आहे जो यूएस कंपन्यांना विशेष व्यवसायांमध्ये परदेशी कामगारांना कामावर ठेवण्याची परवानगी देतो. यूएसने गेल्या वर्षी भारतीय विद्यार्थ्यांना 1.25 दशलक्ष व्हिसा जारी केले होते. हा एक विक्रम आहे.
हेही वाचा :
- PM Modi Visit Mosque in Egypt : पंतप्रधान नरेंद्र मोदी देणार इजिप्तमधील मशिदीला भेट; जाणून घ्या कारण
- State dinner at White House : स्टेट डिनरच्या मैफीलीत पंतप्रधान मोदींनी केला विनोद, पहा व्हिडिओ
- India to Sign Artemis Accords : इस्त्रो नासा 2024 मध्ये लाँच करणार संयुक्त अंतराळ मोहीम, भारत आर्टेमिस अ‍ॅकॉर्डमध्ये होणार सामील
