अफगाणिस्तानः अमेरिकेच्या हवाई हल्ल्यात 200 हून अधिक तालिबानी दहशतवादी ठार

शेबर्गनवर ताबा मिळविल्यानंतर शहरातील एका छुप्या तळावर आयोजित एका कार्यक्रमासाठी तालिबानी दहशतवादी एकत्र आले होते. याच वेळी हवाई हल्ला करून दहशतवाद्यांना लक्ष्य करण्यात आले. यादरम्यान 200 हून अधिक दहशतवादी मारले गेले असून 100 हून अधिक वाहने तसेच मोठ्या प्रमाणात शस्त्रसाठा नष्ट झाल्याचे अफगाण संरक्षण मंत्रालयाचे अधिकारी फवाद अमन यांनी म्हटले आहे.

काबूल : युद्धग्रस्त अफगाणिस्तानातील शेबर्गन शहरातील तालिबानच्या छुप्या तळांवर अमेरिकेने केलेल्या हवाई हल्ल्यात 200 हून अधिक दहशतवादी ठार झाल्याची माहिती अफगाणिस्तानच्या संरक्षण मंत्रालयाने दिली आहे. या शहरावर तालिबानने अलिकडेच ताबा मिळविला होता. दरम्यान, अफगाणिस्तानातील वेगवेगळ्या प्रांतांत गेल्या 24 तासांत सुरक्षा दलाने राबविलेल्या मोहिमेत 385 दहशतवाद्यांचा खात्मा करण्यात यश आले आहे.

तालिबानी आले होते एकत्र

शेबर्गनवर ताबा मिळविल्यानंतर शहरातील एका छुप्या तळावर आयोजित एका कार्यक्रमासाठी तालिबानी दहशतवादी एकत्र आले होते. याच वेळी हवाई हल्ला करून दहशतवाद्यांना लक्ष्य करण्यात आले. यादरम्यान 200 हून अधिक दहशतवादी मारले गेले असून 100 हून अधिक वाहने तसेच मोठ्या प्रमाणात शस्त्रसाठा नष्ट झाल्याचे अफगाण संरक्षण मंत्रालयाचे अधिकारी फवाद अमन यांनी म्हटले आहे.

बी-52 बॉम्बरने हवाई हल्ला

जॉझान प्रांतातील शेबर्गन शहरात आयोजित या कार्यक्रमावर शनिवारी सायंकाळी साडेसहाच्या सुमारास बी-52 बॉम्बरच्या सहाय्याने हवाई हल्ला करण्यात आला. यात दहशतवाद्यांचे मोठे नुकसान झाल्याचे त्यांनी म्हटले आहे. यापूर्वी गझनी प्रांत केंद्राच्या जवळून एका पाकिस्तानी दहशतवाद्यास अफगाण कमांडोंनी अटक केली होती. अनेक दहशतवादी कारवायांमध्ये त्याचा सहभाग आहे. सरकारी सैन्यासोबत आठवडाभराच्या संघर्षानंतर जॉझान प्रांताची राजधानी तालिबानच्या ताब्यात गेली होती असे टोलो न्यूजच्या वृत्तात म्हटले आहे.

तालिबानने शेबर्गनवर मिळविला होता ताबा

शेबर्गन ही प्रांताची दुसरी राजधानी होती आणि दोन दिवसांपासून तालिबानने त्यावर ताबा मिळविला होता. स्थानिक लोकप्रतिनिधींनी यासाठी अफगाण सरकारलाच जबाबदार धरले होते. यानंतर शहर पुन्हा ताब्यात घेण्यासाठी 150 जणांचा समावेश असलेले विशेष सुरक्षा दल पथक शेबर्गनला पाठविण्यात आले होते. शुक्रवारी तालिबानने दक्षिणपश्चिम अफगाणिस्तानातील निम्रोझ प्रांताच्या राजधानीवर ताबा मिळविला होता. सरकारी सैन्याकडून कसल्याही प्रतिकाराशिवाय तालिबानने झारांजवर ताबा मिळविल्याचे टोलो न्यूजच्या वृत्तात म्हटले होते. यानंतर अफगाणिस्तानातील स्थितीवर संयुक्त राष्ट्र सुरक्षा परिषदेतील सदस्य राष्ट्रांनीही चिंता व्यक्त केली होती.

24 तासांत 385 दहशतवाद्यांचा खात्मा

दरम्यान, अमेरिकेनेही अफगाणिस्तानातून माघार घेतलेली असतानाही इथे तालिबानचा वाढता प्रभाव पाहता अफगाणिस्तान सरकारला पूर्ण सहकार्याची भूमिका घेत हवाई हल्ल्यासाठी मदत केली. दुसरीकडे अफगाण सुरक्षा दलाने नंगरहार, लोगार, गझनी, पक्तिका, मैदान, वर्दक, कंदाहार, हेरात, फराह, जॉझान, समन्गन, हेल्मांड, तखार, बागलाह आणि कापिसा प्रांतात गेल्या 24 तासांत राबविलेल्या मोहिमेदरम्यान 385 दहशतवादी ठार झाले असून 210 जखमी झाले आहेत.

हेही वाचा -हिंदू मंदिरावरील हल्ल्याप्रकरणी 38 जणांना घेतले ताब्यात; आंतरराष्ट्रीय समुदायाने फटकारल्यानंतर पाकची कारवाई