'जो बायडेन हे अमेरिकेच्या इतिहासातील सर्वात वाईट उमेदवार'

डोनाल्ड ट्रम्प यांनी जो बायडेन यांच्यावर पुन्हा एकादा निशाणा साधला आहे. जो बायडेन हे अमेरिका अध्यक्षपद निवडणुकीच्या आतापर्यंतच्या इतिहासातील सर्वात वाईट उमेदवार आहेत, अशी टीका ट्रम्प यांनी केली आहे.

वॉशिंग्टन डी.सी -अमेरिकेमध्ये 3 नोव्हेंबरला अध्यक्षपदाची निवडणूक होणार आहे. सत्ताधारी रिपब्लिकन पक्षाचे उमेदवार डोनाल्ड ट्रम्प आणि जो बायडेन यांनी मतदारांना प्रभावित करण्यासाठी प्रचार मोहीम जोरदार सुरू केली आहे. डोनाल्ड ट्रम्प यांनी जो बायडेन यांच्यावर पुन्हा एकादा निशाणा साधला आहे. जो बायडेन हे अमेरिका अध्यक्षपद निवडणुकीच्या आतापर्यंतच्या इतिहासातील सर्वात वाईट उमेदवार आहेत, अशी टीका ट्रम्प यांनी केली आहे.

अमेरिका अध्यक्षपद निवडणुकीच्या आतापर्यंतच्या इतिहासातील सर्वात वाईट उमेदवार माझ्या विरोधात रिंगणात आहे. त्यामुळे माझ्यावर जास्त दबाव आहे. जर ते चांगले उमेदवार असते. तर माझ्यावर कमी दबाव असता. तुम्ही बायडेनसारख्या व्यक्तीपासून कसे पराभूत होऊ शकता, अशी टीका डोनाल्ड ट्रम्प यांनी केली आहे.

अमेरिकाचा अध्यक्ष निवडणे अत्यंत सोपे आहे. कारण, बायडेन यांची निवड केल्यास चीनचा विजय होईल. तर माझी निवड केल्यास अमेरिका जिंकले. बायडेन हे एक भष्ट्राचारी राजकारणी आहेत, हे सर्वांनाच माहिती आहे, असेही ट्रम्प म्हणाले. अमेरिकेच्या सुरक्षेसाठी ही निवडणूक महत्त्वपूर्ण आहे, असेही ते म्हणाले.

अमेरिकी राज्यघटनेनुसार, अमेरिकेच्या राष्ट्राध्यक्ष पदाचा कार्यकाळ केवळ 4 वर्षे आहे. हा कार्यकाळ 20 जानेवारी रोजी संपुष्टात येईल. नुकत्याच पार पडलेल्या एका सर्वेक्षणानुसार अमेरिका स्थित भारतीय यंदा रिपब्लिकन पक्षाचे उमेदवार डोनाल्ड ट्रम्प यांना मोठ्या प्रमाणात मतदान करणार असल्याचा अंदाज वर्तवला जातोय.