वॉशिंग्टन :'इनजेन्युईटी' हे हेलिकॉप्टर मंगळावर उतरले असल्याचे अमेरिकेची अवकाश संशोधन संस्था नासाने सांगितले आहे. ११ एप्रिलला या हेलिकॉप्टरचे उड्डाण पार पडणार आहे. नासाच्याच पर्सेवरेन्स रोव्हरला जोडून हे हेलिकॉप्टर मंगळावर पाठवण्यात आले होते. १८ फेब्रुवारीला पर्सेवरेन्स मंगळावर लँड झाले होते.
"मार्स हेलिकॉप्टर हे मंगळावरील जमिनीवर उतरले आहे. हे हेलिकॉप्टर रोव्हरवरुन जमिनीवर सुरक्षितपणे उतरवण्यात नासाच्या वैज्ञानिकांना यश आले आहे." अशा आशयाचे ट्विट करत नासाच्या कॅलिफोर्नियामधील जेट प्रोपल्शन लॅबने याबाबत माहिती दिली.
या हेलिकॉप्टरचे मंगळावरील उड्डाण ८ एप्रिलला होणार होते. मात्र, नासाने हे उड्डाण ११ एप्रिलपर्यंत पुढे ढकलले. गेल्या आठवड्यात याबाबत निर्णय घेण्यात आला.
मंगळावर हेलिकॉप्टर उडवणे अधिक कठीण..
पृथ्वीपेक्षा मंगळावर कमी गुरुत्वाकर्षण असल्यामुळे हेलिकॉप्टर उडवणे सोपे जाईल, असे कोणालाही वाटू शकते. मात्र, याउलट हे अतिशय अवघड आहे. पृथ्वीवरील वातावरणाच्या घनतेच्या तुलनेत मंगळावरील घनता ही केवळ एक टक्का आहे. मंगळावर दिवसाच्या वेळी पृथ्वीच्या तुलनेत अर्ध्याच प्रमाणात सूर्यप्रकाश असतो. तर, रात्री तापमान चक्क उणे ९० अंश सेल्सिअसपर्यंत जाते. या तापमानात जर इलेक्ट्रॉनिक वस्तूंना सुरक्षा आवरण नसेल, तर त्या निकामी होण्याचा धोका असतो.
हे सर्व लक्षात घेऊन, इनजेन्युईटी हेलिकॉप्टरचा आकार लहान ठेवण्यात आला आहे. तसेच, याच्या सर्व भागांची कॅलिफोर्नियामध्ये चाचणी करण्यात आली आहे.
हेही वाचा :बॉम्बची धमकी अन् सर्वात मोठं विमानतळ केलं रिकामं!
