महात्मा गांधींच्या पुतळ्याच्या विटंबनेचा कॅलिफोर्नियात निषेध, भारतीयांचे शांती आंदोलन

इंडियन असोसिएशन ऑफ साक्रामेन्टो आणि भारतीय-अमेरिकन हिंदु संघटनांनी या शांती आंदोलनाचे आयोजन केले होते. यावेळी गांधी पुतळा शांती समितीचे सदस्य श्याम गोयल यांनी पुतळा विटंबनेच्या घटनेवर दुःख व्यक्त केले.

वॉशिंग्टन : महात्मा गांधींच्या पुतळ्याच्या विटंबनेच्या निषेधार्थ कॅलिफोर्नियातील भारतीय अमेरिकन समुदायातील नागरिकांनी शांती आंदोलन केले. यावेळी खलिस्तान समर्थकांनी घोषणाबाजी करीत शांती आंदोलनाला विरोधही दर्शविला. महात्मा गांधींच्या पुतळ्याच्या विटंबनेचा सगळीकडून निषेध केला जात आहे.

भारतीय समुदायाचा समावेश

कॅलिफोर्नियातील एका सिटी पार्कमध्ये हे सामुदायिक शांती आंदोलन करण्यात आले. इंडियन असोसिएशन ऑफ साक्रामेन्टो आणि भारतीय-अमेरिकन हिंदु संघटनांनी या शांती आंदोलनाचे आयोजन केले होते. यावेळी गांधी पुतळा शांती समितीचे सदस्य श्याम गोयल यांनी पुतळा विटंबनेच्या घटनेवर दुःख व्यक्त केले. शांतता आणि अहिंसेच्या मार्गाने आपल्या समस्या सोडविण्यासाठी महात्मा गांधींचे विचार आजही जगासाठी अपरिहार्य असल्याचे ते यावेळी म्हणाले. डेविस शहराच्या महापौर ग्लोरिया पार्टीडा यांनीही या घटनेवर दुःख व्यक्त केले.

खलिस्तान समर्थकांचा गोंधळ

खलिस्तान समर्थक संघटनेच्या काही जणांनी यावेळी महात्मा गांधींविषयी आक्षेपार्ह घोषणाबाजी केली. तसेच शांती आंदोलनात गोंधळ घालण्याचा प्रयत्न केला. एका महिला वक्त्यावर हल्ल्याचा प्रयत्नही यावेळी त्यांनी केला. डेविस शहरात महात्मा गांधींचा पुतळा पुन्हा बसविण्यास या संघटनांचा विरोध आहे. डेविस शहरात पुतळा बसविल्यापासूनच ओएफएमआय या संघटनेचा विरोध होता. 2016 मध्ये डेविस शहरात महात्मा गांधींचा पुतळा बसविण्यात आला होता.

काय आहे प्रकरण?

कॅलिफोर्नियातील डेविस शहरातील महात्मा गांधींच्या पुतळ्याची काही समाजकंटकांनी गेल्या आठवड्यात विटंबना केली होती. यानंतर या घटनेचा जगभरातून निषेध करण्यात आला. 2016 मध्ये हा पुतळा येथे बसविण्यात आला होता. पोलिसांनी हे प्रकरण नोंदवून घेत तपास सुरू केला आहे.