मुंबई- कंगना रणौत निर्मित टिकू वेड्स शेरू चित्रपट शुक्रवारी अमेझॉन प्राइमवर प्रदर्शित झाला. ओटीटीवर रिलीज झाल्यानंतर अवघ्या काही तासात यावर सोशल मीडियातून प्रतिक्रिया उमटल्या आहेत. तुम्ही जर हा चित्रपट ऑनलाई पाहण्याच्या तयारीत असाल तर प्रेक्षकांनी दिलेल्या या प्रतिक्रियांवर एकदा जरुर नजर टाका.
नवाजुद्दीन सिद्दीकी आणि अवनीत कौर यांची मुख्य भूमिका असलेल्या या चित्रपटाला ट्विटरवर आवश्यक इतके प्रेम मिळाले आहे. नेटिझन्सनी या चित्रपटावर कौतुकाचा वर्षाव केला आहे, विशेष उल्लेख करून पदार्पण करणाऱ्या अवनीत कौरचे कौतुक होत आहे. एका युजरने प्रतिक्रिया देताना लिहिले, 'एक सुंदर गोड आणि निरागस रोमँटिक प्रेमकथा!! कॉमेडी, रोमान्स, ड्रामा यांनी परीपूर्ण असलेले मनोरंजन! टिकु वेड्स शेरू हा चित्रपट उत्कृष्ट अभिनय, प्रेमळ पात्रे, उच्च दर्जाची गुणवत्ता असलेला चित्रपट आहे'.
दुसर्‍या एका ट्विटर युजरने लिहिलंय, 'मी नुकताच अमेझॉन प्राइमवर टिकू वेड्स शेरु हा चित्रपट पाहिला. कॉमेडी, रोमान्स, ड्रामाने परिपूर्ण असा हा चित्रपट आहे. नवाजुद्दीन सिद्दीकी आणि अवनीत कौर यांची ऑनस्क्रीन केमिस्ट्री छान होती. मला हा चित्रपट आवडला! चित्रपट एक परिपूर्ण रत्न आहे! कंगना रनौत जी कधीच आपल्याला निराश करत नाही'.
आणखी एकाने लिहिले, 'टिकू वेड्स शेरुपाहून मी अक्षरशः अवाक झालोय. अवनीत कौरच्या अभिनयाने मी प्रभावीत झालो आहे. नवाजुद्दीनची तर किती तारीफ करायची तितकी ती थोडीच आहे. इतकी छान कथा दाखवल्याबद्दल कंगनाच्या टीमचे आभार'. अशाच प्रकारे कंगनाच्या टीमला शुभेच्छा देणारे आणि चित्रपटावर कौतुकाचा वर्षाव करणारे आणि नवाजुद्दीन आणि अवनीतच्या अभिनयाची प्रशंसा करणारे अनेक ट्विट पाहायला मिळत आहे.