मुंबई - हिंदी चित्रपटसृष्टीतील ख्यातनाम अभिनेता सतिश कौशिक यांचे हृदयविकाराच्या झटक्याने निधन झाले. आयुष्याच्या शेवटच्या दिवसापर्यंत आनंदात मित्रांसोबत वेळ घालवल्यानंतर वयाच्या ६६ व्या वर्षी त्यांनी अखेरचा श्वास घेतला. सतीश कौशिक हे स्वत:ला तंदुरुस्त ठेवण्यासाठी हलकासा व्यायाम करत असत. कागज या चित्रपटात ते आपल्याला अखेरचे पाहायला मिळाले होते. मृत्यूच्या अखेरच्यातही काळात ते अभिनय विश्वात सक्रिय होते. आता त्यांच्या मृत्यूनंतर, त्यांच्या शेवटच्या कॉमेडी शो पॉप कौनचा ट्रेलर रिलीज झाला आहे, ज्यामध्ये सतीश कौशिकची कॉमिक स्टाईल पुन्हा एकदा पाहायला मिळत आहे.
सतीश कौशिक यांच्या निधनानंतर तिसऱ्या दिवशी पॉप कौन या मालिकेचा ट्रेलर प्रदर्शित झाला आहे. सतीश कौशिक व्यतिरिक्त या मालिकेत कॉमेडीचे दिग्गज स्टार जॉनी लिव्हर, चंकी पांडे, राजपाल यादव आणि सौरभ शुक्ला हे देखील दिसणार आहेत. कुणाल खेमूही या शोमध्ये आहे. ट्रेलरमध्ये सतीश कौशिक यांना पाहून चाहत्यांचे डोळे पाणावले आहेत.
पॉप कौनची कथा? - 'पॉप कौन' एका मुलावर आधारित आहे जो आपल्या खऱ्या वडिलांच्या शोधात हताश आणि त्रस्त आहे. कथेत चार वेगवेगळ्या व्यक्ती त्या मुलाचे वडील असल्याचा दावा करताना दिसतात. अशा स्थितीत हा मुलगा पूर्णपणे गोंधळून गेला आहे. वडिलांच्या शोधात त्रस्त झालेल्या या मुलाची भूमिका कुणाल खेमूने साकारली आहे. या मालिकेत सतीश कौशिक देखील वडिलांच्या भूमिकेत आहेत.