मुंबई - प्रसिद्ध चित्रपट निर्माता करण जोहरचा लोकप्रिय टॉक शो कॉफी विथ करण-7 च्या पहिल्या दोन भागांनी धुमाकूळ घातला असून आता या शोच्या तिसऱ्या भागाचा प्रोमो रिलीज करण्यात आला आहे. शोच्या तिसर्‍या एपिसोडमध्ये बॉलिवूड आणि साऊथ फिल्म इंडस्ट्रीत जोरदार चर्चा रंगणार आहे, कारण यावेळी अक्षय कुमार आणि दक्षिण सिनेमाची नंबर वन अभिनेत्री सामंथा रुथ प्रभू या शोमध्ये येत आहेत. शोच्या पहिल्या एपिसोडमध्ये रणवीर सिंग आणि आलिया भट्टने दणका दिला होता आणि दुसऱ्या एपिसोडमध्ये बॉलिवूड स्टार किड्स सारा अली खान आणि जान्हवी कपूर आली होती.
या शोचे दोन्ही भाग प्रेक्षणीय होते आणि आता तिसर्‍या भागाचा व्हिडिओ पाहिल्यानंतर कळते की यावेळी साऊथ फिल्म इंडस्ट्री आणि अक्षय कुमारच्या वैयक्तिक आयुष्यातील अनेक खुलासे होणार आहेत. येथे, सामंथा रुथ प्रभू देखील तिच्या आवडी-निवडीबद्दल सांगणार आहे.
प्रोमोमध्ये करणने अक्षय आणि सामंथा यांना विचारलेल्या एक-दोन प्रश्नांमुळे चाहत्यांची उत्कंठा वाढली आहे आणि आता ते शो स्ट्रिम होण्याची वाट पाहत आहेत. करणने अक्षय कुमारला विचारले की, जर पूर्वीचा ऑस्कर होस्ट क्रिस रॉक्सने तुझी पत्नी ट्विंकल खन्ना हिची चेष्टा केली असेल तर तू काय करशील? अक्षय कुमारने "मी त्याच्या अंतिम संस्कारासाठी पैसे देईन", "ठीक आहे" असे जोरदार उत्तर दिले.