Interview with Yami Gautam : यामी गौतम म्हणते, 'तुमच्या आयुष्यातील काही भाग लवपला तर तुम्ही प्रेक्षकांना सरप्राईज करू शकता!'

चोर निकल के भागा हा रहस्यमय अ‍ॅक्शन चित्रपट नुकताच नेटफ्लिक्स ओटीटीवर रिलीज झाला आहे. अखेरपर्यंत श्वास रोखून धरायला लावणाऱ्या या चित्रपटात यामी गौतम धर हिने मुख्य भूमिका साकारली आहे. या चित्रपटाची कथा तर उत्कंठा वाढवणारी आहेच पण कलाकारांनीही कमालीचा अभिनय केला आहे. यानिमित्ताने यामी गौतम हिने आमच्या प्रतिनिधीला दिलेली खास मुलाखत.

मुंबई - सध्या बरेच चित्रपट चित्रपटगृहांत प्रदर्शित होत असले तरी ओटीटीवर सुद्धा मोठ्या संख्येने चित्रपट प्रदर्शित होताना दिसतात. काही चित्रपट तर खास डिजिटल प्लॅटफॉर्म्ससाठी बनविले जातात. प्रेक्षकांचा ओढा ओटीटीकडे वळल्यापासून बरेच मोठे स्टार्स या प्लॅटफॉर्मचा रस्ता पकडू लागले आहेत. नुकताच ओटीटीवर चोर निकल के भागा नावाचा चित्रपट प्रदर्शित झालाय ज्यात यामी गौतम धर प्रमुख भूमिकेत आहे. आमचे प्रतिनिधी कीर्तिकुमार कदम यांनी यामी गौतमसोबत संवाद साधला आणि तिची मते जाणून घेतली.

बरेच चित्रपट थिएटर ऐवजी ओटीटी वर प्रदर्शित होताहेत, याबद्दल तुझे काय मत आहे? - मला दोन्ही माध्यम आवडतात. काबील, विकी डोनर, बदलापूर, बाला, उरी असे माझे अनेक सिनेमे चित्रपटगृहांत प्रदर्शित झाले आणि चांगले चालले. तसेच ओटीटी वर अ थर्सडे, दसवी, लॉस्ट सारख्या चित्रपटांना उत्तम प्रतिसाद मिळाला. आता नुकताच ओटीटी वर प्रदर्शित झालेल्या चोर निकल के भागा या चित्रपटलादेखील प्रेक्षक पाठिंबा मिळतोय याचा आनंद आहे. मी एक कलाकार आहे आणि माध्यम कुठलाही असलं तरी मी माझं काम चोख करते. चित्रपट ठराविक ठिकाणी प्रदर्शित होणार आहे म्हणून माझ्या परफॉर्मन्स मध्ये उतारचढाव बघायला मिळणार नाहीत. मी नेहमी माझे बेस्ट देण्याचा प्रयत्न करीत असते.

परंतु चित्रपटसृष्टीतील जवळपास सर्वांनाच चित्रपट सिनेमागृहांतच प्रदर्शित व्हावा असे वाटत असते. मी स्वतः कम्युनिटी व्ह्यूविंग मध्ये खूष असते. अनेक प्रेक्षक एकाच वेळी हसतात, भावुक होतात, शिट्या-टाळ्या मारतात याची मजा काही और आहे. मला आठवते की आमचे वडील आम्हाला पिक्चर बघायला नेत असत, तेव्हा थिएटर मध्ये शिरताच गरमागरम पॉपकॉर्न चा वास अजूनही लक्षात आहे. लहान ठिकाणी प्रेक्षकसंख्या मोजून सामोसे, कोल्ड ड्रिंक च्या बाटल्या आणल्या जात असत. तसेच ओटीटी माध्यमावर कधीही कुठेही चित्रपट बघता येत असल्यामुळे अनेकांना ते सोयीचे वाटते. महत्वाचं म्हणजे निर्मात्याला काय हवंय. चित्रपट कुठे प्रदर्शित करावा याचा विशेषाधिकार त्याला आहे आणि आर्थिक गणितं सांभाळून तो निर्णय घेत असतो. माझ्यामते दोघांमध्ये बॅलन्स ठेवला तर दोन्ही माध्यमं एकत्र नांदू शकतील.

तू चित्रपट निवडताना काय ध्यानात ठेवतेस? - स्क्रिप्ट. माझा पहिला चित्रपट विकी डोनर मध्ये सुद्धा स्क्रिप्ट उत्तम होती. जेव्हा संहिता उत्तम असते तेव्हा मला कम्फर्टेबल वाटते. प्रत्येक चित्रपट आपापले चॅलेंज घेऊन येत असतो. मी संहिता निवडताना दोन गोष्टींचे ध्यान ठेवते. स्क्रिप्ट मला एक कलाकार म्हणून कसे वाटते आणि तेच मला एक प्रेक्षक म्हणून कसे वाटते. या दोन्हींमध्ये तो बसत असेल तर मी तो चित्रपट स्वीकारते. काहीवेळा चित्रपट मनासारखा बनत नाही पण म्हणून मी कोणाला दोष देत नाही कारण त्या लोकांनीच मला त्यावेळी काम दिलेले असते.

कोरोना पूर्व आणि कोरोना पश्चात काळ कलाकारांना आणि चित्रपटसृष्टीला बरंच काही शिकवून गेले. आम्ही परिस्थितीशी जुळवून घ्यायला शिकलो. त्याचवेळी ओटीटी प्लॅटफॉर्म अनेकांच्या मदतीला धावून आला. त्यामुळे लोकांच्या सिनेमा बघण्याच्या पद्धतीत आमूलाग्र बदल आला. अर्थात सिनेमे चित्रपटगृहांत प्रदर्शित झाले पाहिजेत आणि चालले पाहिजेत. सध्या सिनेसृष्टीत ‘पिरियड ऑफ करेक्शन’ सुरु आहे. परंतु त्यासाठी लेखकांनी आणि दिग्दर्शकांनी उत्तमोत्तम संहिता आणि चित्रपट प्रेक्षकांना दिले पाहिजेत जेणेकरून प्रेक्षक आपसूक थिएटरकडे वळतील.

सध्या समाज माध्यमांना अवास्तव महत्व दिलं जातंय असं तुला वाटतं का? - सोशल मीडिया जरी एकमेकांशी संवाद साधण्यासाठी असला तरी त्याचे स्तोम माजविले जातेय असे माझे वैयक्तिक मत आहे. कलाकारांच्या आयुष्यात काय चाललंय याची इत्यंभूत माहिती लोकांकडे असते. अर्थात ती कलाकारांनीच पुरविलेली असते. सतत लोकांसमोर राहिल्यामुळे तुमच्याबद्दलची कुतूहलता कमी होते असं मला वाटते. तुमच्या आयुष्यातील काही भाग अज्ञात ठेवला तर तुम्ही प्रेक्षकांना सरप्राईज करू शकता. तसेच हल्ली स्वतःबद्दल चांगलं चुंगलं लिहून आणणे हा प्रकार वाढलाय. अर्थात त्यासाठी पैसे मोजावे लागतात. परंतु मला ते पटत नाही आणि जे करतात त्यांच्यावर आक्षेपही नाही. मी माझ्या कामाबद्दल बोलू शकेन परंतु ते चांगलंच आहे याची सक्ती मी करीत नाही. मी माझ्या कामाबद्दल चित्रपटाच्या माध्यमातून बोलू शकते.

हेही वाचा -Salman Khan: सलमान खानला मुंबई हायकोर्टाचा मोठा दिलासा