मुंबई - Ananya Panday and Aditya Roy Kapur : हिंदी चित्रपटसृष्टीतील अभिनेता शाहरुख खानची मुलगी सुहाना खान, दिवंगत अभिनेत्री श्रीदेवीची धाकटी मुलगी खुशी कपूर आणि दिग्गज अभिनेता अमिताभ बच्चन यांचा नातू अगस्त्य नंदा स्टारर 'द आर्चीज' रिलीज होण्यासाठी सज्ज आहे. 'द आर्चीज' हा चित्रपट 7 डिसेंबरला नेटफ्लिक्सवर प्रदर्शित होणार आहे. शाहरुख खाननं आपल्या मुलीच्या डेब्यू चित्रपटाच्या स्क्रिनिंगला आपल्या संपूर्ण कुटुंबासह हजेरी लावली. या प्रीमियरला अनेक बॉलिवूड स्टार्स उपस्थित होते. यावेळी बॉलिवूडचे प्रसिद्ध जोडपे अनन्या पांडे आणि आदित्य रॉय कपूरही स्क्रिनिंगला पोहोचलं.
अनन्या पांडे आणि आदित्य रॉय कपूर एकत्र :'द आर्चीज'च्या स्क्रिनिंगमध्ये, अनन्या पांडेनं ऑफ-शोल्डर ब्लॅक ड्रेस परिधान केला होता. यावेळी आदित्य रॉय कपूर नेव्ही ब्लू सूटमध्ये दिसला. यावेळी हे जोडपं एकत्र गप्पा मारताना दिसलं. या जोडीने पापाराझींला फोटोसाठी पोझ दिली. दरम्यान, या कार्यक्रमाच्या व्हायरल झालेल्या दुसऱ्या एका व्हिडिओमध्ये आदित्य रॉय कपूर अभिनेत्री कतरिना कैफ आणि तिची बहीण इसाबेल कैफसोबत बोलताना दिसत आहे. अनन्या पांडे आणि आदित्य रॉय कपूर गेल्या काही दिवसांपासून चर्चेत आहेत. अनन्यानं आदित्यबरोबर मालदीवमध्ये तिचा वाढदिवस साजरा केला होता. याआधी हे कपल पहिल्यांदाच युरोप व्हॅकेशनवर एकत्र दिसले होते.