मुंबई - खेळाची राजकारणाशी सांगड घालून गुंफण्यात आलेली कथा 'विजय भव' या आगामी चित्रपटात बघायला मिळणार आहे. 'विजय भव' हे केवळ दोन शब्द प्रचंड उर्जा आणि विजयी होण्यासाठी शक्ती देणारे आहेत. यशाचा हाच गुरुमंत्र आता रसिकांना मोठया पडद्यावर चित्रपटाच्या रूपात पहायला मिळणार आहे. या चित्रपटात कबड्डीवर आधारलेलं कथानक असलं तरी कबड्डीचा हा डाव राजकारणाच्या पटलावर रंगलेला पहायला मिळणार असल्याचे संकेत ट्रेलर पाहिल्यावर मिळतात.
स्वास्तिक मोशन पिक्चर्स प्रोडक्शनची निर्मिती आणि केनिल एन्टरटेन्मेंटची प्रस्तुती असलेल्या 'विजयी भव' या आगामी मराठी चित्रपटाची निर्मिती किर्तन गोरधनभाई पटेल आणि जगदीश एम. पवार यांनी केली आहे. शैलेश पटेल आणि अतुल सोनार यांनी या चित्रपटाचं दिग्दर्शन केलं आहे. इंडियन आयडल फेम जगदीश चव्हाण या चित्रपटात मुख्य भूमिकेत झळकणार असल्याची बातमी आल्यानंतर लगेचच ट्रेलर लाँचच्या माध्यमातून 'विजय भव'ची झलक पहायला मिळाल्याने प्रेक्षकांची उत्सुकता वाढली आहे.
खेळ, प्रेमकथा, राजकारण, नातेसंबंध, मैत्री अशा विविध माध्यमांतून 'विजय भव'चं कथानक उलगडत जाणार आहे. प्रवाहापेक्षा काहीशा वेगळ्या कथानकावर आधारलेला हा चित्रपट प्रेक्षकांना नक्कीच आपलासा वाटेल अशी प्रतिक्रीया शैलेश पटेल आणि अतुल सोनार या दिग्दर्शक द्वयींनी दिली आहे. कथानकापासून अभिनयापर्यंत आणि गीत-संगीतापासून सादरीकरणापर्यंत सर्वच बाबतीत हा चित्रपट रसिकांचं पूर्ण मनोरंजन करणारा असून, अखेरपर्यंत खुर्चीला खिळवून ठेवणारा असल्याची भावना निर्मात्यांनी व्यक्त केली आहे.