मुंबई - Rashmika-Vijay Deverakonda : नॅशनल क्रश म्हटलं जाणार्‍या अभिनेत्री रश्मिका मंदान्नासाठी करिअरच्या दृष्टीनं 2023 वर्ष हे खूप विशेष होते. 'अ‍ॅनिमल' या चित्रपटात तिनं रणबीर कपूरची पत्नी गीतांजलीची भूमिका साकरली. या चित्रपटामधील रश्मिकाचा अभिनय हा अनेकांना आवडला. रश्मिकाच्या वैयक्तिक आयुष्याबद्दल बोलायचं झालं तर ती लवकरच सेटल होण्याच्या तयारीत आहे. रश्मिका आणि विजय फेब्रुवारीमध्ये साखरपुडा करू शकतात. या बातमीला अद्याप अधिकृत दुजोरा मिळालेला नाही. साऊथचा सुपरस्टार विजय देवराकोंडा सतत चर्चेत असतो. त्याची गर्लफ्रेंड रश्मिका मंदान्ना आणि तो अनेकदा एकत्र दिसतात.
विजय देवराकोंडा आणि रश्मिका मंदान्नाची प्रेमकहाणी : विजय देवराकोंडानं रश्मिका मंदान्नासोबत 'गीता गोविंदम' आणि 'डियर कॉम्रेड' या दोन साऊथ चित्रपटामध्ये काम केलं आहे. त्यांचा 'गीता गोविंदम' हा चित्रपट अनेकांना आवडला होता. हा चित्रपट 15 ऑगस्ट, 2018 रोजी रुपेरी पडद्यावर प्रदर्शित झाला होता. या चित्रपटामधील गाणीही खूप हिट झाली होती. या चित्रपटामध्ये चाहत्यांनी रश्मिका आणि विजयची जोडी खूप पसंत केली होती. यानंतर या जोडप्याच्या नात्याबद्दलच्या बातम्या येऊ लागल्या. आता रश्मिका मंदान्नानं बॉलिवूडमध्ये 'अ‍ॅनिमल' चित्रपटातून आपल्या अभिनयाची छाप सोडली आहे. आता ती बॉलिवूडमधील अनेक प्रोजेक्टमध्ये दिसणार आहेत.