मुंबई - Arjun Kapoor and salman khan : बॉलिवूड अभिनेता अर्जुन कपूर आणि सलमान खान हे दोघेही एकमेकांशी बोलत नाहीत. हे अनेकांना माहीत आहे. काही काळापूर्वी अर्जुन आणि सलमानच्या नात्यात दुरावा निर्माण झाला होता, मात्र आता दोघांमध्ये सर्व काही सुरळीत सुरू असल्याचं दिसून येतंय. दरम्यान आता सलमान खान आणि अर्जुन कपूर यांच्यातील कोल्ड वॉर संपलंय. सलमान खान त्याच्या 'टायगर 3' या चित्रपटामुळे चर्चेत आहे. सध्या तो 'टायगर 3'च्या प्रमोशनमध्ये गुंतलाय. भारत आणि पाकिस्तान यांच्यातील सामन्याच्या दरम्यान सलमान खान 'टायगर 3'चं प्रमोशन करणार आहे. हा सामना 14 ऑक्टोबरला अहमदाबादच्या स्टेडियमवर खेळला जाणार आहे. सलमाननं याबद्दल नुकतीच घोषणा केली आहे.
सलमान खान करणार 'टायगर 3'चं प्रमोशन : 'यशराज फिल्म्स'नं आपल्या सोशल मीडिया हँडलवर सलमानचा प्रमोशन व्हिडिओ शेअर केलाय. हा व्हिडिओ सोशल मीडियावर खूप व्हायरल होतोय. दरम्यान आता अर्जुन कपूरला हा व्हिडिओ आवडला आहे. यानंतर अर्जुन आणि सलमानमधील शीतयुद्ध संपल्याचं बोललं जातंय. अर्जुन कपूर सलमान खानबरोबरच्या मतभेदांबद्दल कधीही जाहीरपणे बोलला नाही. अर्जुन कपूरशी मलायका अरोराची वाढती जवळीक सलमान खानचा भाऊ अरबाज खान आणि मलायकाच्या घटस्फोटाला कारण ठरल्याचं बोललं जातं. त्यानंतर सलमान आणि अर्जुनमधले संबंध दुरावले. अर्जुनचे वडील बोनी कपूर यांनी एका मुलाखतीदरम्यान सांगितलं होतं की, अर्जुन आणि सलमानचे संबंध चांगले नाहीत. बोनी कपूर यांनी 2020 मध्ये दिलेल्या मुलाखतीत काही गोष्टींचा खुलासा करत सांगितलं होत की, अर्जुनला कायम दिग्दर्शक बनायचं होतं. त्यामुळेच त्याला हिरो म्हणून लॉन्च करण्याचा माझा कोणताही विचार नव्हता. पण एके दिवशी मला सलमानचा फोन आला, त्यानंतर त्यानं मला सांगितलं की अर्जुनला अभिनयक्षेत्रात उतरवा, त्यानंतर अर्जुननं अभिनयक्षेत्रामध्ये पदार्पण केलं.