मुंबई - निर्माता दिग्दर्शक करण जोहर ६ वर्षानंतर पुन्हा दिग्दर्शन करतोय. रॉकी और रानी की प्रेम कहानी या चित्रपटाचा टीझर काही दिवसापूर्वी रिलीज झाल्यानंतर या चित्रपटात भव्यता, झगमगाट किती आहे याची कल्पना एव्हाना प्रेक्षकांनी आली होती. आता या चित्रपटातील तुम क्या मिलें हे पहिले गाणे रिलीज करण्यात आलंय.
रॉकी और रानी की प्रेम कहानी या शीर्षकावरुनच हा चित्रपट एक लव्ह स्टोरी असल्याचे स्पष्ट आहे. मात्र एखादी कथा करण जोहर जेव्हा पडद्यावर मांडतो तेव्हा ती भव्य आणि लार्जर दॅन लाईफ असते. याचा प्रत्यय हे गीत पाहताना आल्या शिवाय राहात नाही. अरजिंत सिंगचे काळजाला भिडणारे आर्त स्वर, अमिताभ भट्टाचार्य यांनी शब्दबद्ध केलेली सुंदर रचना आणि प्रतीम यांनी चढवलेला संगीताचा साज असेल तर गाणे सर्व सीमा पार करुन जाणार हे वेगळे सांगण्याची गरज नाही.
तुम क्या मिलें हे गाणे रणवीर सिंग आणि आलिया भट्ट यांच्यावर चित्रीत झालंय. नेत्र सुखाद बर्फाळ प्रदेशातील रोमँटिक वातावरण, रिमझीम बरसणारा बर्फ आणि उत्साही रॉकी आणि राणी हे तरुण जोडपे यात पाहायला मिळते. या गाण्यात दोघांचाही रसरशीत रोमँटिकपणा, ताल धरायला लावणारा ठेका आणि निसर्गाचा सुंदर देखावा मंत्रमुग्ध करणारा आहे.
निर्माता करण जोहरने हे गीत आपल्या इन्स्टाग्रामवर शेअर केलंय. त्याने कॅप्शनमध्ये लिहिलंय, 'कोणतीही प्रेमकथा एका समर्पक प्रेमगीतासाठी पात्र आहे! आणि मी धन्य आहे की तुम क्या मिलें हे गीत आमच्या रॉकी और रानी की प्रेम कहानीसाठी आहे. हे गाणे आता रिलीज झाले आहे. हा चित्रपट २८ जुलै रोजी सिनेमागृहात दाखल होणार आहे'.