मुंबई - Thangalaan teaser : साऊथचा प्रसिद्ध अभिनेता विक्रमचा एक दमदार चित्रपट पुढील वर्षी चित्रपटगृहात दाखल होणार असून त्याची पहिली झलक आज पाहायला मिळाली. 'थंगालन'चा दमदार टीझर आज रिलीज झाला आहे. या चित्रपटात कोलार गोल्ड फील्ड्सची कहाणी दाखवण्यात येणार आहे, जी एका सत्य घटनेवर आधारित आहे. कोणताही संवाद नसलेल्या 1 मिनिट 32 सेकंदाच्या या व्हिडिओमध्ये विक्रमला पाहून तुम्हाला धक्का बसेल. विक्रमव्यतिरिक्त या चित्रपटामध्ये मालविका मोहनन, पार्वती तिरुवोथु, हरिकृष्णन, मुथु कुमार आणि डॅनियल कॅलटागीरोन हे कलाकार दिसणार आहेत.
'थंगालन' चित्रपटाबद्दल :'थंगालन'चं दिग्दर्शन पा रंजीत यांनी केले आहे. या चित्रपटाची सिनेमॅटोग्राफी किशोर कुमार यांनी केली आहे. याशिवाय 'थंगालन'ला जी.व्ही. प्रकाश कुमार यांनी संगीत दिलं आहे. चित्रपटाचे शूटिंग 118 दिवसांत पूर्ण झालं आहे. हा चित्रपट पुढील वर्षी 26 जानेवारी रोजी तमिळ, तेलुगू, हिंदी, मल्याळम आणि कन्नड भाषांमध्ये रुपेरी पडद्यावर प्रदर्शित होईल, हे जाहीर झालंय. विक्रमचा 'थंगालन' हा चित्रपट बॉक्स ऑफिसवर धुमाकूळ घालण्याची शक्यता आहे. या चित्रपटामध्ये अप्रतिम अ‍ॅक्शन पाहायला मिळणार आहे. चित्रपटाची कहाणीही वेगळी असणार आहे. विक्रमचे चाहते हा चित्रपट पाहण्यासाठी खूप आतुर आहेत.