मुंबई Sukhee Movie Trailer : शिल्पा शेट्टी सध्या तिच्या आगामी 'सुखी' या चित्रपटामुळे चर्चेत आहे. या चित्रपटाचा ट्रेलर प्रदर्शित झाले आहे. 'सुखी' हा एक बॉलिवूड कॉमेडी-ड्रामा चित्रपट आहे. 'सुखी' चित्रपट 22 सप्टेंबर 2023 रोजी रुपेरी पडद्यावर प्रदर्शित होईल. सोनल जोशी दिग्दर्शित या चित्रपटात शिल्पा शेट्टीसोबत अमित साध, चैतन्य चौधरी आणि दिलनाज इराणी यांच्या प्रमुख भूमिका आहेत. या चित्रपटाची कहाणी ही 38 वर्षांची पंजाबी गृहिणी सुखप्रीत 'सुखी' कालरा हिच्या व्यक्तिरेखेभोवती फिरते, सुखप्रीत ही तिच्या नेहमीच्या जीवनाला कंटाळलेली असते, तिला तिच्या शाळेतील 'गेट टुगेदर'मध्ये सहभागी झाल्यानंतर तिचं तारुण्य पुन्हा एकदा जागं होतं.
'सुखी'चा ट्रेलर प्रदर्शित : या चित्रपटामध्ये शिल्पा शेट्टी व्यतिरिक्त कुशा कपिला, दिलनाझ इराणी, पावलीन गुजराल, चैतन्य चौधरी आणि अमित साध यांसारखे कलाकार मुख्य भूमिकेत आहेत. या चित्रपटाचं दिग्दर्शन सोनल जोशी यांनी केलं आहे. या चित्रपटाची निर्मिती भूषण कुमार, कृष्ण कुमार, विक्रम मल्होत्रा आणि शिखा शर्मा यांनी केली आहे. सध्या या चित्रपटाचा ट्रेलर हा एक्स, इंस्टाग्राम आणि यूट्यूबवर प्रदर्शित झाला आहे. या चित्रपटाच्या ट्रेलरच्या पोस्टवर शिल्पाच्या अनेक चाहत्यांच्या कमेंट येत आहेत. या चित्रपटासाठी तिचे चाहते खूप उत्सुक आहेत. चित्रपटाच्या ट्रेलरमध्ये सुखप्रीतचा संघर्ष दाखवला गेला आहे.