मुंबई - बॉलिवूडमधील अनेक मंडळी मराठी पडद्यावर एन्ट्री करताना दिसतात. बॉलिवूड सुपरस्टार सलमान खान रितेश देशमुख दिग्दर्शित ‘वेड’ मध्ये कॅमियो करीत आहे. आता त्याची ‘जय हो’ ची हिरॉईन डेझी शहा मराठी चित्रपटातून झळकणार आहे. ती ‘दगडी चाळ २' मधील ' राघू पिंजऱ्यात आला' या गाण्यावर थिरकणार आहे. गाण्याचे भन्नाट बोल, डेझीचा सीझलिंग परफॉर्मन्स आणि घायाळ करणाऱ्या तिच्या अदा या सगळ्यामुळे हे गाणे ग्लॅमरस बनले आहे. तिच्या ह्या आयटम सॉंग वर अख्खा महाराष्ट्र फिदा होईल हे निश्चित. या चित्रपटात मकरंद देशपांडे, अंकुश चौधरी आणि पूजा सावंत यांच्या प्रमुख भूमिका आहेत.

'दगडी चाळ २' हा चित्रपट येणार असल्याचे समजल्यापासूनच यातील प्रमुख व्यक्तिरेखा कोण साकारणार, याची सर्वच प्रेक्षकांना उत्सुकता लागली होती आणि नुकतेच यातील प्रमुख चेहरे आपल्या समोर आले व आता या चित्रपटातील पहिले आणि जबरदस्त गाणे संगीतप्रेमींच्या भेटीला आले आहे. 'राघू पिंजऱ्यात आला ' असे या गाण्याचे बोल असून डेझी शाह या बॅालिवूडमधील नामांकित चेहऱ्याने या गाण्याच्या निमित्ताने मराठी सिनेसृष्टीत पदार्पण केले आहे. अमितराज यांनी संगीतबद्ध केलेल्या या गाण्याला मुग्धा कऱ्हाडेचा आवाज लाभला आहे. तर अवघ्या बॉलीवूडला आपल्या तालावर नाचवणाऱ्या आदिल शेख यांनी या गाण्याचे नृत्य दिग्दर्शन केले आहे.
या गाण्याबद्दल निर्मात्या संगीता अहिर म्हणतात, "जेव्हा या गाण्याचा आम्ही या चित्रपटात समावेश करण्याचे ठरवले, तेव्हा सर्वात आधी माझ्यासमोर डेझी शाहचा चेहरा आला. याबाबत आम्ही तिला विचारणा केली आणि तिनेही त्वरित होकार दिला. हिंदी चित्रपटातील अभिनेत्रीने मराठी पडद्यावर काम करायला इतक्या लगेच होकार देणे, ही आमच्यासाठी आनंदाची गोष्ट आहे. गाण्याची टीमच इतकी अफलातून आहे की, हे गाणे, डेझीचे नृत्य प्रेक्षकांना नक्कीच आवडेल. प्रत्येकाला थिरकायला लावणारे हे गाणे आहे.''