मुंबई - Pushpa 2 :साउथ फिल्म इंडस्ट्रीतील अभिनेता अल्लू अर्जुन गेल्या वर्षी 2023 मध्ये एकाही चित्रपटात दिसला नव्हता. मात्र आता तो 2024 या वर्षात मोस्ट अवेटेड चित्रपट 'पुष्पा 2'मध्ये रुपेरी पडद्यावर धमाल करण्यासाठी परत येत आहे. गेल्या काही दिवसांपासून 'पुष्पा 2'ची रिलीज डेट पुढं ढकलण्यात आली असल्याची बातमी समोर येत होती. दरम्यान एका रिपोर्टनुसार अल्लू अर्जुन स्टारर 'पुष्पा 2' 15 ऑगस्टच्या मुहूर्तावर प्रदर्शित होणार आहे. 'पुष्पा 2' चित्रपटाच्या प्रदर्शनाची तारीख पुढे ढकलण्यात आलेली नाही. अल्लू अर्जुनच्या चाहत्यांसाठी ही बातमी आनंदाची आहे. आज 11 जानेवारी रोजी दिग्दर्शक सुकुमार यांचा वाढदिवस आहे, त्या निमित्तानं ही नवी अपडेट निर्मात्यांनी चाहत्यांना दिली आहे.
'पुष्पा 2' डेट पुढं ढकलण्यात आली नाही : चित्रपट व्यापार विश्लेषक तरण आदर्श, 'पुष्पा 2' निर्माते आणि मैत्री मूव्ही मेकर्स यांच्या नवीन पोस्टनं या चित्रपटाच्या रिलीजबाबत खुलासा केला आहे. दरम्यान 'पुष्पा 2'च्या निर्मात्यांनी चित्रपट दिग्दर्शक सुकुमार बी यांना त्यांच्या वाढदिवसाच्या शुभेच्छा दिल्या आहेत. या कॅप्शनमध्ये त्यांनी लिहिलं की, ''हा चित्रपट चालू वर्षाच्या स्वातंत्र्यदिनाच्या मुहूर्तावर प्रदर्शित होईल.'' 'पुष्पा 2' या चित्रपटामध्ये अल्लू अर्जुनचा अनोखा अंदाज प्रेक्षकांना पाहायला मिळणार आहे. 'पुष्पा 2' चित्रपटात अल्लू अर्जुन व्यतिरिक्त रश्मिका मंदान्ना, विजय सेतुपती, साई पल्लवी, प्रियामणी, अनसुया भारद्वाज, सुनील, प्रकाश राज, श्रीतेज, जगपती बाबू, राव रमेश आणि इतर काही कलाकार दिसणार आहेत.