मुंबई : साउथ फिल्म इंडस्ट्रीतील सुपरस्टार अल्लू अर्जुनचा आगामी चित्रपट पुष्पा-२ ची टीम एका रस्ता अपघाताची शिकार झाली आहे. बुधवारी तेलंगणाहून आंध्र प्रदेशकडे परतणाऱ्या पीटीसी बसला पुष्पा-२ च्या युनिटच्या बसने धडक दिल्याने हा अपघात झाला. हैदराबाद-विजयवाडा महामार्गावर नरकेटपल्लीजवळ हा अपघात झाला. मीडिया रिपोर्ट्सनुसार, या अपघातात युनिटचे दोन कलाकार जखमी झाले असून त्यांना तातडीने उपचारासाठी रुग्णालयात दाखल करण्यात आले आहे. सुकुमार दिग्दर्शित या चित्रपटाचे चित्रीकरण आंध्र प्रदेशातील श्रीकाकुलम जिल्ह्यात होत आहे, इथे चित्रपटाचे एक शेड्यूल पूर्ण झाले आहे. श्रीकाकुलममध्ये मोठ्या प्रमाणात जंगले आणि शेतजमीन तसेच खडकाळ भूभाग आहे.
पुष्पा-२ चित्रपट : 'पुष्पा-द राइज' चित्रपटानंतर सुकुमारने 'पुष्पा-द रूल'ची कथा लिहिली आहे. या चित्रपटाद्वारे अल्लू अर्जुन आणि रश्मिका मंदान्ना ही जोडी पुन्हा एकदा रूपेरी पडद्यावर दिसणार आहे. त्याचबरोबर या चित्रपटात फहाद फासिल हा पुन्हा एकदा खलनायकाच्या भूमिकेत दिसणार आहे. पुढल्या वर्षी हा चित्रपट सिनेमागृहात दाखल होणार आहे. चित्रपटाच्या दुसऱ्या भागात, देवी श्री प्रसाद पुन्हा आपल्या संगीत आणि गाण्यांनी धुमाकुळ घालण्यासाठी सज्ज आहे . मीडियानुसार, या चित्रपटात रणवीर सिंग एका पोलिस अधिकाऱ्याच्या भूमिकेतही दिसणार आहे, परंतु निर्मात्यांनी अद्याप याची पुष्टी केलेली नाही.