मुंबई - दाक्षिणात्य फिल्म इंडस्ट्रीने न्यूयॉर्कमधील टाईम स्क्वेअर चौकातील बिल बोर्डवर आपली लोकप्रियता मिळवण्याचा नवीन ट्रेंड सुरू केला आहे. यापूर्वी महेश बाबूची मुलगी सिताराची एक ज्वेलरी जाहिरात या बिल बोर्डवर झळकली होती. आता याच जागेचा ताबा प्रभासच्या आगामी 'प्रोजेक्ट के' या चित्रपटाने घेतला आहे.
अलिकडेच 'प्रोजेक्ट के' चित्रपटाच्या रिलीज तारखेसह एक जाहिरात टाईम स्क्वेअर येथील बिलबोर्डवर झळकली आहे. प्रभासनेही याची एक व्हिडिओ क्लिप आपल्या सोशल मीडियावर शेअर केली आहे. या व्हिडिओत 'प्रोजेक्ट के' चित्रपटाची ठळक अक्षकरात प्रदर्शनाची तारीख असलेली जाहिरात आपण पाहू शकतो. याला कॅप्शन देताना प्रभासने लिहिलंय, ' 'प्रोजेक्ट के' ने टाईम्स स्क्वेअरवर कब्जा केलाय, हे फार भारी आहे. रिबेल स्टार प्रभास.'
प्रोजेक्ट चित्रपटाच्या प्रमोशनची सुरूवात अमेरिकेतून २० जुलै पासून दिएगो कॉमिक कॉन इव्हेन्टपासून सुरू होणार आहे. या भव्य सोहळ्यात चित्रपटाचे शीर्षक 'प्रोजेक्ट के' का आहे याचा खुलासा केला जाणार आहे. याशिवाय या चित्रपटाचा ट्रेलर व इतर प्रमोशनल साहित्याचेही लॉन्चिंग केले जाईल. या सोहळ्याला प्रभाससह चित्रपटातील इतर कलाकारही हजर राहतील. या सोहळ्यासाठी आंतरराष्ट्रीय कलाकारही हजर राहणार आहेत. कमल हासनदेखील या समारंभाला उपस्थित राहणार असल्याचे सांगितले जाते. या लॉन्चिंग सोहळ्याची जाहिरात आता न्यूयॉर्कच्या ऐतिहासिक टाईम्स चौकात सुरू झाली आहे.
आगामी 'प्रोजेक्ट के' चित्रपटामध्ये बाहुबली स्टार प्रभास शिवाय कमल हासन, प्रभास, अमिताभ बच्चन, दीपिका पादुकोण आणि दिशा पटानी यांच्याही भूमिका असतील. दिग्गज भारतीय कलाकार एकाच चित्रपटातून झळकणारा 'प्रोजेक्ट के' हा एक भव्य चित्रपट असल्याचे मानले जाते.