मुंबई - AR Rahman : ऑस्कर विजेता संगीत दिग्दर्शक ए.आर. रहमान संगीत जगतातील एक मोठं नाव आहे. ए आर रहमान याच्या चेन्नईतील लाईव्ह कॉन्सर्टबाबत प्रेक्षकांमध्ये प्रचंड नाराजी आहे. चेन्नईमध्ये एका कार्यक्रमाचं आयोजन करण्यात आलं होतं. या कार्यक्रमात चाहत्यांनी प्रचंड गर्दी केली होती. ए.आर. रहमानच्या कॉन्सर्टमधल्या गचाळ नियोजनाबद्दल चाहत्यांनी नाराजी व्यक्त केली आहे. या कार्यक्रमादरम्यान बरीच बाचाबाची झाली आणि आता सोशल मीडियावर लोक आयोजकांवर टीका करत आहेत. याशिवाय काही लोकांनी आता रहमान याच्यावरही राग काढला आहे.
सदोष व्यवस्थापनामुळे अडचणी वाढल्या :गेल्या रविवारी चेन्नईमध्ये रहमानचा लाइव्ह शो होता. या शो वाट चाहते खूप आतुरतेने पाहत होते. या कार्यक्रमामध्ये चाहत्यांना अनेक समस्यांना सामोरं जावं लागलं. सोशल मीडियावर या कार्यक्रमाशी संबंधित अनेक व्हिडिओ आणि फोटो व्हायरल झाले आहेत. रहमानच्या कार्यक्रमात उपस्थित असलेल्या प्रेक्षकांनी सांगितलं की, कार्यक्रमाला आलेल्या अनेकांनी चेंगराचेंगरीसारखी परिस्थिती अनुभवली. काही लोकांनी आयोजकांवर कार्यक्रमात प्रवेश न दिल्याचा आरोप केला. काहींनी सांगितले की, आवाज खूपच कमी होता आणि स्टेज दूर असल्यानं गाणी व्यवस्थित ऐकू येत नव्हती. अनेकांकडे प्रवेश पास असूनही त्यांना आत जाऊ दिलं नाही. याशिवाय या कार्यक्रमात पार्किंगची योग्य सोय केली नव्हती.