मुंबई: बहुप्रतीक्षित ओ माय गॉड २ चित्रपटाचा टिझर अखेर रिलीज झाला आहे. अक्षय कुमार आणि पंकज त्रिपाठी यांच्या मुख्य भूमिका असलेला हा चित्रपट ११ ऑगस्ट रोजी रिलीज होणार आहे. ओएमजी या २०११ साली रिलीज झालेल्या चित्रपटाचा हा सीक्वेल आहे.
या चित्रपटात अक्षय कुमार भगवान शिवाच्या रुपात पडद्यावर अवतरणार आहे. अक्षयने चित्रपटाची झलक दाखवणारा व्हिडिओ सोशल मीडियावर शेअर करताना म्हटलं होत की, 'ओएमजी २ चा टीझर ११ जुलै रोजी रिलीज होतोय. त्यानुसार आज हा टीझर प्रेक्षकांच्या भेटीस आला.'
या टीझरची सुरुवात रात्री रोषणाईने सजलेल्या मंदिराच्या शिखरापासून होते. पार्श्वभूमीवर हिंदीमधून व्हाईस ओव्हर सुरू होतो. त्यात म्हटलं जातं की, 'इश्वर है या नही इसकी प्रमाण इन्सान आस्तिक या नास्तिक होकर दे सकता है, पर भगवान अपने बनाये हुए बंधुओ में कभी भेदभाव नही करता. फिर वो नास्तिक कांजीलाल मेहता हो, या आस्तिक कांती शरण मुदगल. और तकलीफ में लगायी हुयी पुकार उसे, हमेशा उसे अपने बंधुओ तक खिंच ही लाती है.'
ओएमजी २ हा चित्रपट अमित राय यांनी दिग्दर्शित केला आहे. पहिल्या भागात परेश रावल यांनी कांजीलाल मेहता ही नास्तिक माणसाची व्यक्तीरेखा साकारली होती. कांजीलालने उपस्थित केलेल्या प्रश्नांनी अनेक मुद्दे उपस्थित केले होते. लोकांनी त्याला भरभरुन प्रतिसाद दिला होता. अखेरीस कांजीलाल इश्वराचे अस्तित्व मान्य करतो, असे दाखवण्यात आले होते. ओएमजीच्या दुसऱ्या भागात पंकज त्रिपाठी आस्तिक दाखवण्यात आलाय. इश्वराची अहोरात्र आराधना करणाऱ्या या आस्तिक व्यक्तीच्या जीवनात संकटाचा डोंगर कोसळतो. आपल्या परीने तो या संकटाचा सामना करण्याचा प्रयत्न करतो. भगवान शिवा त्याच्या मदतीसाठी येतात, असे टीझरमध्ये दिसते. चित्रपटाची कथा रंजक दिसत असून इतर व्यक्तीरेखा अद्याप गुलदस्त्यात आहेत. ओ माय गॉड २ मध्ये अक्षय कुमार, पंकज त्रिपाठी यांच्यासह यामी गौतम आणि अरुण गोविल यांच्याही प्रमुख भूमिका आहेत. या चित्रपटाची बॉक्स ऑफिसवर सनी देओलच्या गदर २ चित्रपटाशी टक्कर होणार आहे.