मुंबई- तारक मेहता का उल्टा चश्मा ही विनोदी मालिका गेल्या १५ वर्षापासून प्रेक्षकांचे सातत्याने मनोरंजन करत आली आहे. या मालिकेत कोणीही एक हिरो किंवा हिरॉइन नाही. त्यामुळे यात सामान्य वाटणारे एखादे पात्रही नायकासारखे वावरताना दिसते. यातील प्रत्येक व्यक्तीरेखा महत्त्वाच्या आहेत आणि सर्वच लोकप्रियही आहेत. कोणतीही मालिका वर्षानुवर्षे चालत असेल तर कलाकारांची रिप्लेसमेंट हा विषय नक्कीच येतो. त्याप्रमाणे या मालिकेतील अनेक पात्रे ही बदलण्यात आली आहेत.आतापर्यंत तारक मेहतामधील टप्पूची आई म्हणजेच दयाबेनची भूमिका साकारणारी दिशा वकानी, सोढीची भूमिका साकारणारा कलाकार, शैलेश लोढा, नेहा मेहता यांच्यासह अनेक कलाकारांनी मालिका सोडली आहे. या कलाकारांच्या जागी नवीन कलाकारांना अभिनय करण्याची संधी देत निर्मात्यांनी ही मालिका इथंवर आणली आहे. या शोमधील टप्पू ही व्यक्तीरेखा साकारणारा राज अनादकट यांने अलिकडे ही मालिका सोडली होती.
राज अनादकट तारक मेहतातून बाहेर पडणार अशा चर्चा अनेक दिवस सुरू होत्या. अखेर स्वतः राजनेच एक पोस्ट लिहून याचा खुलासा केले. त्याने लिहिले, 'सर्वांना नमस्कार, सर्व प्रश्न आणि तर्कांना विश्रांती देण्याची वेळ आली आहे. नीला फिल्म प्रॉडक्शन आणि तारक मेहता का उल्टा चष्मा यांच्याशी माझा संबंध अधिकृतपणे संपुष्टात आला आहे. मझा शिकण्याचा, मित्र बनवण्याचा आणि काही सर्वोत्तम वर्षांचा हा एक अद्भुत प्रवास आहे. या प्रवासात मला पाठिंबा देणाऱ्या प्रत्येकाचे मी आभार मानू इच्छितो - TMKOC ची संपूर्ण टीम, माझे मित्र, कुटुंब आणि अर्थातच तुम्हा सर्वांचे आभार. शोमध्ये ज्यांनी माझे स्वागत केले आणि माझ्यावर प्रेम केले. 'टपू' माझ्या कलेबद्दलचे तुमचे प्रेम मला नेहमीच तुमच्यापैकी प्रत्येकाला, प्रत्येक वेळी माझे सर्वोत्तम देण्यास प्रवृत्त करते.', असे राज अनादकटने निवेदनात म्हटले होते.