मुंबई - Leo Movie :थलपथी विजयचा 'लिओ' हा बहुप्रतीक्षित चित्रपट आज चित्रपटगृहांमध्ये प्रदर्शित झाला आहे. दरम्यान, विजयचा चित्रपट प्रदर्शित झाल्याचा आनंद साजरा करण्यासाठी, अनेक चाहत्यांनी पहाटेपासूनच जल्लोष सुरू केला. सध्या काही व्हिडिओ सोशल मीडियावर व्हायरल होत आहेत. या व्हिडिओमध्ये थलपथी विजयचे चाहते नाचताना आणि जल्लोष करताना दिसत आहेत. दक्षिण भारतात अनेक ठिकाणी बॅण्ड वाजवून उत्साहात चित्रपटगृहांमध्ये चाहत्यांनी गर्दी केली. हा चित्रपट 'जवान' आणि पठाणचं रेकॉर्ड ब्रेक करेल असं सध्या दिसत आहे.
थिएटरच्या बाहेर वाजला बॅण्ड : तिरुअनंतपुरममधील श्री पद्मनाभ थिएटरच्या बाहेर 'लिओ'च्या रिलीजचा आनंद साजरा करताना चाहत्यांनी वाजत गाजत चित्रपटाचं स्वागत केलं. हा चित्रपट बॉक्स ऑफिसवर प्रचंड कमाई करेल अशी अपेक्षा केली जात आहे. लोकेश कनागराज दिग्दर्शित 'लिओ'मध्ये संजय दत्त, त्रिशा कृष्णन आणि अर्जुन सर्जा यांच्याही भूमिका आहेत. या चित्रपटामध्ये संजय दत्तनं खलनायकाची भूमिका साकारली आहे. अलीकडेच सुपरस्टार रजनीकांतनं थलपथी विजयला 'लिओ'साठी शुभेच्छा दिल्या होत्या. 'लिओ' या चित्रपटाबद्दल बोलताना त्यांनी म्हटलं होत, 'मी देवाला प्रार्थना करतो की हा चित्रपट खूप हिट व्हावा.'