मुंबई - Jr NTR Escaped Japan Earthquake : नवीन वर्ष 2024 जपानसाठी भयानक ठरलं आहे. 1 जानेवारी रोजी जपानमध्ये भूकंपामुळे झालेल्या विध्वंसाची भयानक दृश्ये सध्या पाहायला मिळत आहेत. साऊथ सुपर स्टार ज्युनियर एनटीआरनं 2 जानेवारीच्या रात्री जपानमध्ये झालेल्या भूकंपाबद्दल एक पोस्ट एक्सवर (पूर्वीचे ट्विटर) शेअर केली आहे. या पोस्टमध्ये त्यानं लिहिलं, ''मी आज जपानहून मायदेशी परतलो. गेल्या अनेक दिवसांपासून जपानमध्ये असल्यामुळं या घटनेबद्दल मला खूप धक्का बसला आहे. जपानमधील लोकांसाठी मी शोक व्यक्त करतो''. 2024 च्या पहिल्याच दिवशी जपानमध्ये खळबळ उडाली होती. ज्युनियर एनटीआरनं सांगितले की तो बरेच दिवस जपानमध्ये राहिला होता. भूकंपाच्या अवघ्या काही तासांपूर्वी तो तेथून निघून गेला होता.
ज्युनियर एनटीआरनं शेअर केली पोस्ट : एनटीआर आणि त्यांचे कुटुंबीय एकमेकांसोबत क्वालिटी टाईम घालविण्यासाठी अनेकदा विदेशात जातात. यावर्षी त्यांनी ख्रिसमस आणि नवीन वर्ष जपानमध्ये साजरे केले. एनटीआरची पत्नी लक्ष्मी प्रणती आणि त्यांची दोन मुले अभय आणि भार्गव यांनी जपानमध्ये नवीन वर्षाचं स्वागत केले. 1 जानेवारी रोजी ज्युनियर एनटीआर, त्यांची पत्नी आणि दोन मुले हैदराबाद विमानतळावर दिसले होते. विदेशात जाण्यासाठी एनटीआर कामातून थोडा ब्रेक घेतला होता. एनटीआर दिग्दर्शक कोरटाला शिवाच्या 'देवरा' चित्रपटाच्या शुटिंगमध्ये व्यग्र आहे. त्याचा हा चित्रपटदोन भागात रुपेरी पडद्यावर प्रदर्शित होणार आहे.