मुंबई - Shah Rukh Khan's birthday: शाहरुख खान 2 नोव्हेंबर रोजी आपला 58वा वाढदिवस साजरा करत आहे. किंग खानच्या वाढदिवसानिमित्त त्याच्यावर चाहत्यांकडून आणि स्टार्सकडून शुभेच्छांचा वर्षाव होत आहे. दरम्यान हा दिवस 'जवान' दिग्दर्शक अ‍ॅटलीसाठी खूप खास आहे. अ‍ॅटलीनेही शाहरुख खानला वाढदिवसाच्या शुभेच्छा दिल्या आहेत. त्यानं 'जवान'च्या सेटवरील सोशल मीडियावर आजवर प्रसिद्ध न झालेला फोटो शेअर केला आहे. अ‍ॅटलीनं 'विक्रम राठौर'च्या पात्र (शाहरुख खान ) सोबतचा स्वतःचा एक सुंदर फोटो शेअर करून किंग खानला वाढदिवसाच्या शुभेच्छा दिल्या आहेत. या फोटोमध्ये अ‍ॅटली आणि शाहरुख डॅशिंग दिसत आहेत.
साऊथ दिग्दर्शक अ‍ॅटलीनं शेअर केला फोटो : अ‍ॅटलीनं सोशल मीडियावर फोटो शेअर करत लिहिलं, 'माझ्या प्रिय शाहरुख सरांना वाढदिवसाच्या शुभेच्छा, लव्ह यू सर'. साऊथ दिग्दर्शक अ‍ॅटलीनं पहिल्यांदाच शाहरुख खानबरोबर काम केलं आहे. त्यानं 'जवान' चित्रपट 300 कोटींच्या बजेटमध्ये बनवला आहे. या चित्रपटामध्ये शाहरुख खानची पत्नी गौरी खाननं देखील पैसे गुंतवले आहेत. 'जवान' चित्रपटानं बॉक्स ऑफिसवर 1100 कोटींहून अधिक कमाई केली आहे. या चित्रपटानं देशातच नाही तर जगभरात धुमाकूळ घातला होता. 'जवान' चित्रपटामध्ये किंग खानसोबत नयनतारा, दीपिका पदुकोण, विजय सेतुपती, सान्या मल्होत्रा, योगी बाबू आणि रिद्धी डोगरा हे कलाकार दिसले आहेत.