मुंबई - Indian Navy Day 2023 : भारतीय सैन्य हे जगातील सर्वात शक्तिशाली सैन्यांपैकी एक आहे. 4 डिसेंबर रोजी 'भारतीय नौदल दिन' साजरा केला जातो. देशाच्या सुरक्षेत नौदलाचीही मोठी भूमिका आहे. भारतीय नौदलाचे सैनिक, ज्यांना आपण जलरक्षक म्हणू शकतो, ते जलमार्गाच्या सुरक्षेत सतर्क असतात. 1971 मध्ये भारत-पाक युद्धात भारतीय नौदलानं देशाला विजय मिळवून दिल्यापासून हा दिवस साजरा करण्यास सुरुवात झाली. भारताच्या तिन्ही सेना सर्व बाजूंनी देशाचे रक्षण करण्यासाठी सज्ज आहेत.
नौदल दिनानिमित्त शेअर करण्यात आला व्हिडिओ :आज सिंधुदुर्ग येथे नौदल दिनानिमित्त छत्रपती शिवाजी महाराजांच्या सागरी वारसा याच्या आठवण करत आदरांजली वाहिली जाणार आहे. छत्रपती शिवाजी महाराजांनी भारतीय नौदलाचा पाया रचला होता. दरम्यान, आता त्यांना ट्रिब्युट देणारा एक खास व्हिडिओ शेअर करण्यात आला आहे. या व्हिडिओला आवाज हा महानायक अमिताभ बच्चन यांनी दिला आहे. नौदल सेनानं त्यांच्या एक्स हँडलवर अमिताभ बच्चन यांच्या आवाजातील हा खास व्हिडिओ पोस्ट करत लिहिलं, 'भारतीय नौदलच्या पराक्रमाचे आणि अष्टपैलुत्वाचे साक्षीदार व्हा, कारण ते 'जलमेव यस्य, बलमेव तस्य' या प्राचीन मंत्राचे उदाहरण देते. जे भारताच्या समृद्धी आणि कल्याणासाठी आमच्या अदम्य नौसेना सामर्थ्याचे महत्त्वपूर्ण प्रासंगिकता दर्शवतं. आमचा सागरी इतिहास आणि शौर्य या आधुनिक नौदलाच्या भावनेशी जोडणारा व्हिडिओ पाहा. सायंकाळी 4.30 वाजता भारतीय नौदलाच्या यूट्यूब चॅनलवर छत्रपती शिवाजी महाराजांच्या पुतळ्याचं अनावरण' असं यावर कॅप्शन देण्यात आलं आहे.