मुंबई - Happy Birthday Tabu :अभिनेत्री तब्बू तिचा 4 नोव्हेंबर रोजी 52 वा वाढदिवस साजरा करत आहे. या खास दिवशी चित्रपटसृष्टीतील अनेकजण तिला शुभेच्छा देत आहेत. अजय देवगण, करीना कपूर, फराह खानसह अनेक बॉलिवूड स्टार्सनी शुभेच्छा देत एक पोस्ट शेअर केली आहे. तब्बू तिच्या करिअरपेक्षा वैयक्तिक आयुष्यामुळं जास्त चर्चेत असते. वयाच्या 52 व्या वर्षीही तब्बू अविवाहित आहे. तब्बूचं पूर्ण नाव तबस्सुम फातिमा हाश्मी आहे. तब्बूनं हिंदी चित्रपट आणि वेब सीरीज तसेच साऊथ चित्रपटांमध्ये तिच्या अभिनयानं सर्वाचे मनं जिंकले आहेत. जवळपास 38 वर्षांपासून इंडस्ट्रीत सक्रिय असलेल्या तब्बूनं अनेक उत्तम चित्रपट दिलेत.
सेलिब्रिटींनी दिल्या तब्बूला शुभेच्छा :अजय देवगणनं तब्बूचा एक न पाहिलेला व्हिडिओ शेअर करत तिला वाढदिवसाच्या शुभेच्छा दिल्या आहेत. व्हिडिओ शेअर करताना त्यानं कॅप्शन लिहलं की, 'कधी चाकांच्या मागे तर कधी पडद्यामागे, तुझ्यासोबत सर्वकाही साहसी आहे'. तब्बूला शुभेच्छा देताना करीना कपूरनं लिहलं, 'हॅपी बर्थडे डिअर तब्बू, तुझा दिवस खूप खास जावो'. त्यानंतर फराह खाननं लिहलं, 'हॅपी बर्थडे डार्लिंग' याशिवाय तिचे अनेक चाहते तिला या खास दिवशी शुभेच्छा देत आहेत. तब्बू वैयक्तिक आयुष्याबद्दल कधीच काहीही उघड करत नाही. तिचे नाव अनेक सेलिब्रिटींशी जोडले गेले. पण दाक्षिणात्य अभिनेता नागार्जुनसोबतच्या तिच्या नात्याची खूप चर्चा होती.