मुंबई - Guntur Kaaram box office Day 6: साऊथ अभिनेता महेश बाबूचा नुकताच प्रदर्शित झालेला अ‍ॅक्शनपट 'गुंटूर कारम' चित्रपट सध्या बॉक्स ऑफिसवर धमाल करत आहे. या चित्रपटानं रिलीजच्या पहिल्या दिवशी जगभरात 94 कोटी रुपयांचा व्यवसाय केला होता. आजवर या चित्रपटानं देशांतर्गत बॉक्स ऑफिसवर 100 कोटी रुपयांची कमाई केली आहे. हा चित्रपट जगभरातील 200 कोटींच्या दिशेनं वाटचाल करत आहे. आज, 18 जानेवारीला हा चित्रपट रिलीजच्या सातव्या दिवसात प्रवेश करत आहे. दरम्यान, या चित्रपटानं सहाव्या दिवशी बॉक्स ऑफिसवर किती कमाई केली हे जाणून घेऊ या.
'गुंटूर कारम'चं बॉक्स ऑफिस कलेक्शन :सॅकनिल्कच्या रिपोर्टनुसार, या चित्रपटानं रिलीजच्या पहिल्या दिवशी देशांतर्गत 41.3 कोटीचा व्यवसाय केला होता. यानंतर दुसऱ्या दिवशी 13.55 कोटी, तिसऱ्या दिवशी 14.05 कोटी, चौथ्या दिवशी 14.1 कोटी, पाचव्या दिवशी 10.95 कोटी आणि सहाव्या दिवशी 7 कोटींची कमाई केली. यासह या चित्रपटाचं एकूण बॉक्स ऑफिस कलेक्शन 100.95 कोटी झालं आहे. हा चित्रपट बॉक्स ऑफिसवर 12 जानेवारी रिलीज झाला होता. बॉक्स ऑफिसवर एक आठवडा पूर्ण होण्याआधीच या चित्रपटानं 100 कोटी रुपयांचे देशांतर्गत कलेक्शन केले आहे. हा चित्रपट रुपेरी पडद्यावर वेगानं कमाई करत आहे.