मुंबई :'ड्रीम गर्ल २' या चित्रपटामधील ‘दिल का टेलिफोन २.०’ हे गाणे रिलीज झाले आहे. आयुष्मान खुराना आणि अनन्या पांडेची रंगतदार केमिस्ट्री या चित्रपटामध्ये दाखविण्यात येणार आहे. 'ड्रीम गर्ल २' चित्रपटाद्वारे पुन्हा एकदा आयुष्मान प्रेक्षकांना हसविण्यासाठी येत आहे. २०१९ मध्ये प्रदर्शित झालेल्या 'ड्रीम गर्ल' चित्रपटामुळे हसून हसून प्रेक्षकांच्या पोटात दुखायला लावले होते. आज चार वर्षांनंतर या चित्रपटाचा दुसरा भाग प्रदर्शित होत आहे. त्याचबरोबर या चित्रपटात नुसरत भरुचाच्या जागी आता अनन्या पांडेला घेण्यात आले आहे. आयुष्मान आणि अनन्या पांडे स्टारर चित्रपट 'ड्रीम गर्ल २' रिलीजसाठी सज्ज आहे.
'ड्रीम गर्ल २'चे गाणे : ‘दिल का टेलिफोन २.०’ या गाण्याला संगीत मीट ब्रदर्सने दिले आहे. याशिवाय हे गाणे जोनिता गांधी आणि जुबिन नौटियालने मीट ब्रदर्सच्या सहकार्याने गायले आहे. त्याचबरोबर या गाण्याचे बोल कुमार यांनी लिहिले आहे. आयुष्मान खुराना आणि अनन्या पांडे या चित्रपटासाठी प्रसिद्धीझोतात आले आहेत, कारण दोघेही 'ड्रीम गर्ल २'मध्ये मुख्य भूमिकेत आहेत. याच्यासोबत या चित्रपटात अभिषेक बॅनर्जी, परेश रावल, विजय राज, मनजोत सिंग, राजपाल यादव, सीमा पाहवा, मनोज जोशी, अन्नू कपूर आणि असरानी यांसारख्या स्टार्स देखील आहेत. त्यामुळे यावेळी प्रेक्षकांचे खूप मनोरंजन होईल हे नक्कीच.