मुंबई - शाहरुख खान आणि दीपिका पदुकोन अभिनित आणि रोहित शेट्टी दिग्दर्शित चेन्नई एक्सप्रेसमध्ये उत्तर आणि दक्षिण संस्कृतींचा संगम पाहायला मिळाला होता. त्याच धर्तीवर बॉईज ३ या मराठी चित्रपटामध्ये पश्चिम आणि दाक्षिणात्य संस्कृतींचा संगम बघायला मिळेल असा अंदाज त्याचा ट्रेलर पाहून येतो. नुकताच बॉईज ३ चा ट्रेलर अनावरण सोहळा दणक्यात साजरा झाला आणि धैर्य, ढुंग्या आणि कबीर यांच्यातील मैत्री खरंच खूप धमाल करणार आहे हे ट्रेलर पाहून वाटत आहे.
बॉईज सिरीजने सर्वांचच भरपूर मनोरंजन केले आहे. धैर्य, ढुंग्या आणि कबीर ह्या त्रिकूटाला प्रेक्षकांचा भरभरून प्रेम मिळालं. 'बॉईज' आणि 'बॉईज २' ने बॉक्स ऑफिसवर अक्षरशः दंगा घातल्यानंतर 'बॉईज ३' काय नवीन हंगामा घेऊन येणार याकडे प्रेक्षक आतुरतेने वाट पाहात आहेत. नुकताच 'बॉईज ३'च्या संपूर्ण टीमच्या उपस्तिथीत या चित्रपटाचे ट्रेलर प्रदर्शित करण्यात आले आहे. 'बॉईज ३' चित्रपटाचा ट्रेलर पाहून हे त्रिकूट आणि विदुला करत असलेल्या प्रवासाची झलक आपल्याला पाहायला मिळाली आहे. लुंगीतलं हे कमाल त्रिकूट दक्षिण दिशेला करत असलेल्या प्रवासाची ही गोष्ट आहे. त्यांच्या या प्रवासात आलेलं विदुला नावाचे वळण कोणत्या ठिकाणी या तिघांना घेऊन जाणार ते चित्रपट पाहिल्यानंतरच कळणार.
चित्रपटातील 'लग्नाळू २.o' गाणं प्रेक्षकांना भरपूर आवडले असून विदुलाची वेगळीच छबी या चित्रपटातून प्रेक्षकांच्या समोर आली आहे. मैत्रीमध्ये एकमेकांना अडचणीत टाकणं असो किंवा त्याच अडचणीतून त्यांना बाहेर काढण्यासाठीची मदत असो मित्र नेहमीच हाजीर असतात. मैत्रीची व्याख्या नव्या अंदाजात ह्या चित्रपटात आपल्याला पाहायला मिळणार आहे. विदुलाचा कमाल सेक्सी अंदाज ,सुमंत शिंदे ,पार्थ भालेराव, प्रतीक लाड यांच्या उत्कृष्ट अभिनयाने रंगलेला हा चित्रपट असून तो लवकरच प्रेक्षकांच्या भेटीला येत आहे.