मुंबई - Animal Blockbuster Offer On Ticket : 'अ‍ॅनिमल' हा चित्रपट अजूनही बॉक्स ऑफिसवर सुरू आहे. हा चित्रपट 1 डिसेंबर 2023 रोजी प्रदर्शित झाला. या चित्रपटानं एक महिन्याहून अधिक काळ चित्रपटगृहांमध्ये धुमाकूळ केला. 'अ‍ॅनिमल'नं देशांतर्गत आणि जगभरातील बॉक्स ऑफिसवर भरपूर कमाई केली असून या चित्रपटाचा व्यवसाय अजूनही सुरू आहे. दरम्यान हा 'अ‍ॅनिमल' चित्रपट बघायचा असेल तर, चित्रपट निर्मात्यानं 'अ‍ॅनिमल'ची ब्लॉकबस्टर ऑफर दिली आहे. अभिनेता रणबीर कपूर, अभिनेत्री रश्मिका मंदान्ना, बॉबी देओल, अनिल कपूर आणि तृप्ती दिमरी स्टारर 'अ‍ॅनिमल' चित्रपट थिएटरमध्ये बघायचा असे तर आता फक्त 100 रुपये खर्च करावे लागतील.
'अ‍ॅनिमल' चित्रपटाचं तिकीट 100 रुपये : आतापर्यंत 'अ‍ॅनिमल' चित्रपटाचं तिकीट 300 रुपयांना मिळत होतं. परंतु आता हे तिकिट 100 रुपयांचं करण्यात आलं आहे. 'अ‍ॅनिमल'च्या निर्मात्यांनी त्यांच्या एक्स हँडलवर एक पोस्ट शेअर करून चाहत्यांना या ऑफरबद्दल माहिती दिली आहे. या पोस्टच्या कॅप्शनमध्ये त्यांनी लिहिलं, ''आता फक्त 100 रुपयांमध्ये तुमचा आवडता चित्रपट पाहा.'' या पोस्टला अनेकजण लाईक करत आहेत. नुकतीच 'अ‍ॅनिमल'ची सक्सेस पार्टी आयोजित करण्यात आली होती. या पार्टीमध्ये चित्रपटाची संपूर्ण स्टारकास्ट हजर होती. याशिवाय पार्टीत आलिया भट्ट, रश्मिका मंदान्ना आणि तृप्ती डिमरी यांनी आपल्या सौंदर्यानं सर्वांचं लक्ष वेधून घेतलं होतं.