मुंबई - अभिनेता अंगद बेदी आज 39 वा वाढदिवस साजरा करत आहे. ६ फेब्रुवारी १९८३ ला दिल्लीत जन्मलेला अंगद हा भारताचे माजी क्रिकेटपटू बिशन सिंग बेदी यांचा मुलगा आहे. सहाजिकच क्रिकेटची आवड त्याला लहानपणापासूनच होती. विशेष म्हणजे अंगदने क्रिकेटमध्ये करियर करण्याचे स्वप्न मध्येच सोडून दिले. तो बेदी 19 वर्षाखालील क्रिकेट खेळला आहे. मात्र दरम्यान त्याची आवड मॉडेलिंगमध्ये निर्माण झाली आणि त्याच्या आयुष्याची दिशा बदलली.
अंगदचे क्रिकेटपेक्षा अभिनयाला प्राधान्य - मॉडेलिंग करत असतानाच त्याने अभिनयाचे धडेही गिरवायला सुरुवात केली होती. शशी कुमार दिग्दर्शित काया तरन या चित्रपटातून तो रुपेरी पडद्यावर झळकला आणि त्यानंतर अंगद एनएस माधवनच्या मल्याळम चित्रपट वनमारंगल वीझुम्पोल मध्ये चमकला. अंगदने अनेक बॉलिवूड चित्रपटांमध्ये काम केले आहे. यामध्ये फालतू, पिंक, डिअर जिंदगी आणि टायगर जिंदा है यासारख्या चित्रपटांचा समावेश आहे. वनमारंगल वीझुम्पोल या मल्याळम चित्रपटातील अंगद बेदीच्या अभिनयाचे खूप कौतुक झाले होते.
अंगद बेदीचे नेहा धुपियाशी लग्न - अंगद बेदीने 10 मे 2018 रोजी बॉलिवूड अभिनेत्री नेहा धुपियाशी लग्न केले. दोन्ही कलाकारांनी एकमेकांना बराच काळ डेट केले होते. अखेर 2018 ला त्याने नेहाशी लग्नगाठ बांधली आणि एकत्र सहप्रवास सुरू केला. विशेष म्हणजे, नेहा धुपिया अंगद बेदीपेक्षा वयाने दोन वर्षांनी मोठी आहे. अंगदला दोन मुले आहेत. असे म्हटले जाते की नेहा धुपिया लग्नापूर्वी गर्भवती होती, कारण लग्नानंतर केवळ सहा महिन्यातच तिने एका मुलीला जन्म दिला होता.