मुंबई - PM Modi and Akshay kumar :पंतप्रधान नरेंद्र मोदी यांच्या लोकप्रिय रेडिओ शो 'मन की बात'च्या ताज्या भागात त्यांनी सर्वांना फिटनेससाठी प्रेरित केलं आहे. याशिवाय या शोमध्ये बॉलिवूड स्टार अक्षय कुमारनं त्याचा फिटनेस मंत्र शेअर केला आहे. श्रोत्यांना तंदुरुस्त राहण्यासाठी नैसर्गिक पद्धतींचा अवलंब करण्याचा सल्ला अक्षयनं दिला आहे. निरोगी जीवनशैलीसाठी समर्पित असलेल्या अक्षयनं फॅन्सी जिमच्या नकारात्मक परिणामांबद्दल सांगितलं आहे. याशिवाय त्यानं नैसर्गिक पद्धतीने तंदुरुस्त राहण्यासाठी फॅन्सी जिमपेक्षा पोहणे, बॅडमिंटन खेळणे, पायऱ्या चढणे, व्यायाम करणे, चांगले आरोग्यदायी अन्न खाणं याबद्दल सांगितलं आहे.
अक्षय कुमारचा फिटनेस मंत्र : अक्षय कुमारनं म्हटलं, ''माझा विश्वास आहे की, शुद्ध तूप जर योग्य प्रमाणात सेवन केले तर ते आपल्यासाठी फायदेशीर आहे''. तरुण लोकांमध्ये तूपविषयी गैरसमज काढण्याचं काम अक्षयनं केलं आहे. निरोगी जीवनशैलीसाठी त्यानं यावेळी अनेक टिप्स श्रोत्यांना दिल्या आहेत. 'सिक्स-पॅक' किंवा 'एट-पॅक' ऍब्स मिळविण्यासाठी स्टिरॉइड्स वापरणं, चूकचं असल्याचं त्यानं सांगितलं. याशिवाय अक्षय कुमारनं फिटनेस मंत्र देत पुढं म्हटलं, ''मित्रांनो, अशा शॉर्टकटने शरीर बाहेरून फुगते पण आतून पोकळ होते. लक्षात ठेवा की हे शॉर्टकट तुमचे आयुष्य कमी करू शकतात. आतापासून, फिल्टर जीवन जगू नका, एक फिटर जीवन जगा''. अशा संदेश त्यानं या शोमधून दिला आहे.