मुंबई: साऊथ सुपरस्टार प्रभास आणि बॉलिवूड अभिनेत्री क्रिती सेनॉन स्टारर बहुप्रतिक्षित चित्रपट आदिपुरुष १६ जून रोजी प्रदर्शित होत आहे. आदिपुरुषच्या रिलीजबाबत प्रभासच्या चाहत्यांमध्ये प्रचंड क्रेझ आहे. नुकताच तिरुपती येथे चित्रपटाचा प्री-रिलीज इव्हेंट पार पडला या चित्रपटाबाबत हीच क्रेझ यावेळी देखील पाहायला मिळाली होती. आदिपुरुषची संपूर्ण टीम या कार्यक्रमाला उपस्थित होती आणि प्रभास-क्रितीने आदिपुरुष चित्रपटाचा अंतिम ट्रेलर लॉन्च केला. तसेच आता आदिपुरुषच्या चाहत्यांसाठी एक आनंदाची बातमी आली आहे.आदिपुरुष चित्रपटासाठी मोफत सिनेमा तिकीट वाटण्यात येणार आहे. हा चित्रपट पाच भाषांमध्ये (हिंदी, तमिळ, तेलगू, मल्याळम आणि कन्नड) प्रदर्शित होणार आहे.
मोफत तिकीट कुठे मिळेल? :500 कोटींच्या बजेटमध्ये बनलेल्या आदिपुरुष या चित्रपटाचे जोरदार प्रमोशन केली जात आहे. आता या चित्रपटाची मोफत तिकिटे वाटली जाणार आहेत. 'द काश्मीर फाइल्स' आणि 'कार्तिकेय-2'चे निर्माते अभिषेक अग्रवाल यांनी घोषणा केली आहे की, ते संपूर्ण तेलंगणामध्ये आदिपुरुष चित्रपटाची दहा हजार मोफत तिकिटे वाटणार. याशिवाय त्यांनी त्यांच्या ट्विटमध्ये याबद्दल माहिती देत लिहले, 'श्री राम यांच्याप्रती असलेल्या श्रद्धेमुळे मी आदिपुरुष या चित्रपटाची १० हजार तिकिटे मोफत वाटण्यचा निर्णय घेतला आहे. ही तिकिटे तेलंगणामधील सरकारी शाळा, अनाथाश्रम आणि वृद्धाश्रमातील लोकांना देण्यात येतील,' असे त्यांनी ट्वीटमध्ये म्हटले आहे. त्याबरोबरच त्यांनी मोफत तिकिटासाठी गुगल फॉर्मची लिंक देखील ट्वीटवर शेअर केली आहे.