मुंबई - ज्येष्ठ अभिनेत्री जया बच्चन यांनी त्यांच्या सहकारी खासदारांसाठी मुलगा अभिषेक बच्चन याची मुख्य भूमिका असलेल्या "दसवी" या चित्रपटाचे हाय-प्रोफाइल स्क्रीनिंग आयोजित केले होते.
तुषार जलोटा यांच्या दिग्दर्शनाबाबत अनेक ज्येष्ठ नेत्यांनी सोशल मीडियावर चर्चा केली. महाराष्ट्राच्या खासदार रजनी पाटील यांनी चित्रपटाचे कौतुक केले आणि टीमला शुभेच्छा दिल्या. शिवसेनेच्या उपनेत्या प्रियांका चतुर्वेदी यांनी शिक्षणावर भर देण्यासाठी चित्रपट पाहण्याचे आवाहन केले आहे, तर भारतीय राष्ट्रीय काँग्रेसच्या राष्ट्रीय प्रवक्त्या शमा मोहम्मद यांनी अभिषेकच्या अभिनयाचे तसेच चित्रपटाचे कौतुक केले आहे.
स्क्रिनिंगला अभिषेक आणि श्वेता बच्चन उपस्थित होते. एका कुटिल पण निरक्षर राजकारण्याची कथा यात दाखवण्यात आली आहे. या राजकारणी व्यक्तीला तुरुंगात असताना शिक्षणाची ताकद लक्षात येते आणि तो पुन्हा एकदा शिक्षणाकडे वळतो. अशा प्रकारे शिक्षणाचे महत्त्व अधोरेखीत करणारा दसवी हा चित्रपट आहे. या चित्रपटात यामी गौतम आणि निम्रत कौर यांच्याही भूमिका आहेत.