सोलापूर- माझ्या कार्यकर्त्यांच्या केसालाही धक्का लागला तरी फलटण पासून ते माळशिरसपर्यंत बूथवर एक माणूस ठेवणार नाही, असे वक्तव्य माढ्यातील भाजपचे उमेदवार रणजित नाईक-निबाळकर यांनी केले. माढ्याचे राष्ट्रवादीचे उमेदवार संजय शिंदे यांच्या निमगाव या गावातील सभेत रणजित निंबाळकर यांनी हे वक्तव्य करत संजय शिंदेवर निशाणा साधला आहे. यावेळी बोलताना त्यांनी राष्ट्रवादीचे अध्यक्ष शरद पवारांवरही टीकास्त्र सोडले.
माढा लोकसभा मतदारसंघातील निवडणुकीकडे संपूर्ण राज्यासह देशाचे लक्ष लागले आहे. संजय शिंदे यांनी भाजपची उमेदवारी नाकारून राष्ट्रवादी कॉंग्रेसच्या तिकीटावर निवडणूक लढवत आहेत. त्यामुळे राज्याचे मुख्यमंत्री देवेंद्र फडणवीस आणि चंद्रकांत पाटील यांनी ही निवडणूक प्रतिष्ठेची केली आहे. कोणत्याही परिस्थितीत माढ्याची जागा जिंकायची या हेतूनेच देशाचे पंतप्रधान नरेंद्र मोदी यांची माढा लोकसभा मतदारसंघात सभा घेण्यात आली. त्यानंतर आता प्रचारात रंग भरताना दिसत आहे.