ठाणे -अतिशय शिस्तबद्ध आयएएस अधिकारी आणि डॅशिंग अधिकारी म्हणून ओळख असलेले तुकाराम मुंढे अलीकडच्या महाविकास आघाडीच्या काळात अडगळीत पडलेले पाहायला मिळत होते. मात्र, शिंदे फडणवीस सरकार येताच मुंढे पुन्हा ऍक्शन मोडमध्ये आलेले पाहायला मिळत आहेत. तुकाराम मुंढे यांनी काही दिवसांपूर्वीच आरोग्य सेवा आणि संचालक आरोग्य अभियान पदाचा कार्यभार स्वीकारताच मुंढे यांच्या प्रतिमेचा प्रत्यय पुन्हा येऊ लागला आहे. त्याच बरोबर राज्यातील वरिष्ठ आरोग्य अधिकारी, जिल्हा रुग्णालय, ग्रामीण रुग्णालय, आरोग्य केंद्र मुंढे आला रे आला या दहशतीत दिसून येत आहेत.
राष्ट्रीय आरोग्य अभियान पदाचा कार्यभार - तुकाराम मुंढे हे शिस्तबद्ध आयएएस अधिकारी म्हणून ओळखले जातात. ज्या ठिकाणी ते जातात त्या ठिकाणी आपल्या कामाने ओळख आणि कर्मचारी वर्गावर दबदबा निर्माण करतात. तर याच मुंढेंची आरोग्य सेवा आणि संचालक राष्ट्रीय आरोग्य अभियान पदाचा कार्यभार स्वीकारताच त्यांनी आपल्या कामाचा धडाका सुरु केला आहे. तुकाराम मुंढे यांनी गुरुवार पासून राज्यातील प्राथमिक आरोग्य केंद्र, ग्रामीण रुग्णालय, जिल्हा रुग्णालय रुग्णालय येथे आरोग्य उपसंचालक, जिल्हा आरोग्य अधिकारी यांच्यासह वरिष्ठ डॉक्टरांसह धाडसत्राला सुरुवात करुन पाहणी दरम्यान जे डॉक्टर, अधिकारी किंवा कर्मचारी दोषी आढळल्यास त्यांच्यावर निलंबनाची कारवाई ची सुचना दिल्यानंतर नेहमीच ऑक्सिजनवर असलेल ठाणे जिल्हा सिव्हिल रुग्णालय चांगलंच कामाला लागलं आहे.