स्वातंत्र्यदिनी चीनमध्ये फडकवला तिरंगा; ठाण्यातील महिला पोलिसाची रौप्य कामगिरी

ठाण्यातील महिला पोलीस कर्मचारी सुनीता औसेकर यांनी भारताच्या स्वातंत्र्य दिनाच्या दिवशीच चीनमध्ये जागतिक पोलीस आणि फायर गेम्समध्ये रौप्य पदक पटकावले.

ठाणे -सुनीता औसेकर या ठाण्यातील महिला पोलीस कर्मचारी यांनी चीनमधील चेंगडू शहरात संपन्न झालेल्या जागतिक पोलीस आणि फायर गेम्समध्ये रौप्य पदकाची कामगिरी केली. याबद्दल औसेकर यांचा ठाणे नगर पोलिसांकडून सत्कार करण्यात आला. यावेळी बोलताना भारताच्या स्वातंत्र्य दिनाच्या दिवशीच आपण देशाचा झेंडा चीनमध्ये फडकावू शकलो याचा अभिमान वाटतो, असे औसेकर म्हणाल्या आहेत.

चीनमध्ये तिरंगा फडकावून अन् राष्ट्रगीत गाऊन वाढवली देशाची शान...

चीन तसा भारताचा परंपरागत शत्रू पण याच चीनच्या छाताडावर ऐन स्वातंत्र्य दिनाच्या दिवशीच ठाण्यातील महिला पोलीस कर्मचारी सुनीता औसेकर हिने तिरंगा फडकावून इतिहास घडवला. चीनमधील चेंगडू शहरांत संपन्न झालेल्या जागतिक पोलीस आणि फायर गेम्समध्ये जगातील तब्बल 70 देशाच्या स्पर्धकांनी भाग घेतला होता. त्यात सहभागी झालेल्या भारतीय संघाने 15 ऑगस्ट या आपल्या स्वातंत्र्य दिवशी मैदानावरच झेंडा फडकावून राष्ट्रगीत गाऊन मानवंदना दिली. यातून स्फूर्ती घेत त्याच दिवशी सायंकाळी झालेल्या 5 किलोमीटर चालण्याच्या शर्यतीत सुनीता हिने रजत पदक पटकावले.

ठाणे नगर पोलीस स्थानकातील सहकारी पोलीस कर्मचाऱ्यांच्या वतीने औसेकर यांचा सत्कार करण्यात आला. "सकारात्मक भाव आणि काहीतरी करण्याची जिद्द यामुळेच औसेकर यांनी हे यश संपादित केले", असे ठाणे नगर पोलीस स्थानकाचे वरिष्ठ पोलीस निरीक्षक रामराव सोमवंशी यांनी म्हटले आहे. आपले कर्तव्य बजावत असताना वरिष्ठांनी आपल्याला सरावासाठी वेळ उपलब्ध करून दिल्याबद्दल सुनीता औसेकर यांनी आपल्या यशाचे श्रेय आपल्या वरिष्ठांना दिले. तसेच 2021 साली नेदरलँड्समध्ये होणाऱ्या स्पर्धेसाठी आपण आत्तापासूनच तयारीला लागल्याचे त्यांनी सांगितले.