ठाणे - भिवंडी शहरात अवजड वाहनांना ( Heavy Vehicle Ban In Bhiwandi City ) प्रवेश बंदी आहे. तरी देखील शहराच्या प्रमुख रस्त्यांवर अवजड वाहने फिरतान दिसून येत आहे. बंदी असतानाही जर अवजड वाहने रस्त्यावर दिसून येत असतील तर या वाहनचालकांकडून पैसे घेऊन त्यांना शहरात प्रवेश दिला जातो की काय, असे चित्र आहे. या प्रकारमुळे वाहतूक पोलिसांच्या कामकाजावर प्रश्न चिन्ह उपस्थित झाले आहे.
शहरात अवजड वाहनांना प्रवेश बंदी -
भिवंडी शहरात विविध प्रमुख रस्त्यावर सिमेंटचे रस्ते तयार करण्याचे काम गेल्या ३ वर्षापासून सुरु आहे. त्यातच ठाणे-भिवंडी-कल्याण अशा मेट्रो मार्गाचे कामही सुरु आहे. त्यामुळे शहरात वाहतूक कोंडी मोठ्या प्रमाणात होत आहे. शिवाय शहर व ग्रामीण पट्यात मोठं-मोठी गोदामे असल्याने शहरातील रस्त्यावरून अवजड वाहनांची वर्दळ नेहमीच असल्याचे चित्र पावयास मिळते. अनेक वेळा विविध पक्ष व सामाजिक संघटनानी वाहतूक कोंडीवर मार्ग काढण्यासाठी आंदोलन, मोर्चे, उपोषणही केले आहे. त्यामुळे वाहतूक विभागाने शहरात अवजड वाहनांना प्रवेश बंदी असल्याचे जाहीर करत तसे फलकही शहरातील येणाऱ्या रस्त्यावर लावण्यात आले. तरीदेखील आजही विविध मार्गावर वाहतूक कोंडीचे चित्र कायम आहे. असे असतानाही वाहतूक पोलीस आणि त्यांच्या मदतीला असलेली वार्डन वाहतूक कोंडी सुरळीत करण्याचे सोडून अवजड वाहनचालकांकडून चिरीमिरी घेत असल्याचे दिसून आले. विशेषतः शहराच्या मध्यभागी असलेल्या स्वर्गीय राजीव गांधी चौकात अवजड वाहन चालकांकडून वसुली केली जात असल्याचे दिसून आले आहे. शिवाय गुजराथ व नाशिकहून भिवंडीत दाखल होणाऱ्या वाहनांकडून आदी नदी नाका आणि वंजारपट्टी नाका येथे चिरीमिरी घेऊन शहरात अवजड वहाने सोडली जात आहे.