ठाण्यातील वेदांता रुग्णालयात ऑक्सिजनअभावी चार कोविड रुग्णांचा मृत्यू? चौकशीचे आदेश

ठाण्यातील वर्तकनगर येथील खासगी वेदांता या कोविड रुग्णालयात सोमवारी पहाटे 4 जणांचा मृत्यू झाल्याचे समोर आले आहे. रुग्णालय व्यवस्थापनाच्या निष्काळजीपणामुळे रुग्णांना ऑक्सिजन न मिळाल्याचा आरोप नातेवाईकांनी केला आहे.

ठाणे - ठाण्यातील वर्तकनगर येथील खासगी वेदांता या कोविड रुग्णालयात सोमवारी पहाटे 4 जणांचा मृत्यू झाल्याचे समोर आले आहे. रुग्णालय व्यवस्थापनाच्या निष्काळजीपणामुळे रुग्णांना ऑक्सिजन न मिळाल्याचा आरोप नातेवाईकांनी केला आहे. तर, दुसरीकडे भाजप जिल्हाध्यक्ष आमदार निरंजन डावखरे यांनीही रुग्णालयाला भेट देऊन चौकशी करून प्रशासनाने योग्य ती कारवाई करण्याची मागणी केली आहे. दरम्यान, मनसे विद्यार्थी सेनेचे जिल्हाध्यक्ष संदीप पाचंगे यांनीही रुग्णालयाच्या बेजबाबदारपणाचे हे मृत्यू असल्याचा आरोप केला असून सकाळीच ऑक्सिजन संपला असताना रुग्णालयाकडून ठाणे मनपा प्रशासनाला कळवले नसल्याचे म्हटले आहे.

रुग्णालयाच्या खाली रुग्णांचे नातेवाईक तसेच मनसे, भाजपचे पदाधिकारी जमले असून रुग्णालयाबाहेर मोठ्या प्रमाणात पोलीस बंदोबस्त देखील तैनात करण्यात आलेला आहे. दरम्यान जिल्हाधिकाऱ्यांनी मृत्यूच्या चौकशीचे आदेश दिले आहेत. घटनास्थळी गृहनिर्माण मंत्री जितेंद्र आव्हाड दाखल झाले आहेत. त्यांनीही विचारपूस करुन योग्य ती कारवाई करण्याचे आदेश पालिका प्रशासनाला दिली आहे.

अचानक मृत्यू कसा ? नातेवाइकांचा सवाल

आदल्या दिवशी रुग्ण बरे असताना सोमवारी सकाळी अचानक रुग्ण कसे दगावले असा प्रश्न रुंगाच्या नातेवाईकांनी यावेळी विचारला. अचानक 4 रुग्ण दगवल्याने नातेवाईकांनी हंबरडा फोडला.. दरम्यान रुग्णालयाच्या हलगर्जीपणा मुळे रुग्ण दगावले असल्याचा आरोप यावेळी नातेवाईकांनी केला.

चौकशीचे आदेश -

आज ठाण्यातील वेदांत रुग्णालयात झालेल्या चारही मृत्यूबाबत जिल्हाधिकारी राजेश नार्वेकर यांनी सिव्हिल सर्जन आणि इतर दोन डॉक्टरांच्या टीमना चारही मृत्यूची चौकशी करण्याचे आदेश दिले आहेत. चौकशीनंतरच या मृत्यूचे खरे कारण समोर येऊ शकते.