सराईत तस्कराला ४ लाखांच्या गांजासह पोलिसांनी ठोकल्या बेड्या

एका सराईत तस्कराला ४ लाखांच्या गांजासह सापळा रचून महात्मा फुले चौक पोलिसांनी बेड्या ठोकल्या आहे. त्याच्याकडून २७ किलो ४०५ ग्रॅम वजनाचा ४ लाख ५ हजार किंमतीचा गांजा (अमलीपदार्थ) हस्तगत करण्यात पोलिसांना यश आले आहे.

ठाणे - एका सराईत तस्कराला ४ लाखांच्या गांजासह सापळा रचून महात्मा फुले चौक पोलिसांनी बेड्या ठोकल्या आहे. रहमत युसुफ पठाण (वय, ३१ ) असे गांजा तस्कराचे नाव असून त्याच्याकडून २७ किलो ४०५ ग्रॅम वजनाचा ४ लाख ५ हजार किंमतीचा गांजा (अमलीपदार्थ) हस्तगत करण्यात पोलिसांना यश आले आहे.

तस्करावर खुनाचा प्रयत्न केल्याचाही गुन्हा

रहमत युसुफ पठाण हा कल्याण पश्चिम परिसरातील वल्लीपीर पोलीस चौकीच्या समोर, एका चाळीत राहतो. काही दिवसांपूर्वी एका व्यक्तीवर जीवघेणा हल्ला केल्याप्रकरणी महात्मा फुले चौक पोलीस ठाण्यात त्याच्यावर भा.दं.वि.कलम ३०७, १२०(ब) प्रमाणे दाखल गुन्हा करण्यात आला होता. पोलिसांच्या तपासादरम्यान गुप्तबातमीदाराकडुन रहमत घरी आला असल्याची माहीती मिळाली. पोलीस निरीक्षक नारायण बानकर यांच्या मार्गदर्शनाखाली सहाय्यक पोलीस निरीक्षक दिपक सरोदे, प्रकाश पाटील व इतर पोलीस पथकाने आरोपी राहत असलेल्या परीसरात घेराव घातला व आरोपीला ताब्यात घेतले.

तस्कराच्या घरातून गांजाचा साठा जप्त

पोलिसांनी त्यांनतर आरोपी रहमतच्या राहत्या घराची घरझडती घेतली असता, त्याच्या घरामध्ये एकुण २७ किलो ४०५ ग्रॅम वजानाचा ४ लाख ५ हजार रुपयांचा गांजाचा साठा आढळून आला. त्यानुसार पोलीस ठाण्यात अधिनियम १९८५ चे कलम ८ (क) २० (क), २९ प्रमाणे गुन्हा दाखल करून रहमतला अटक करण्यात आली आहे.

तस्कर कोरोना पॉझीटीव्ह

तस्कर रहमतला न्यायालयात हजर केले असता, न्यायालयाने त्याला पोलीस कोठडी सुनावली होती. त्याला पोलीस कोठडीत ठेवण्याअगोदर पोलिसांनी त्याची कोरोना चाचणी केली होती. त्याचा रिपोर्ट पॉझीटीव्ह आल्याने, त्याला पुढील उपचाराकरीता सरकारी रूग्णालयात दाखल करण्यात आले आहे. कोरोनावर औषधोपचार करून आल्यानंतर महात्मा फुले चौक पोलीस ठाण्यात दाखल असलेल्या गून्ह्याप्रमाणे अटक करण्याची तजविज ठेण्यात आल्याची माहिती पोलिसांकडून देण्यात आली आहे.

हेही वाचा -मुख्यमंत्री उद्धव ठाकरे आज संध्याकाळी साधणार जनतेशी संवाद!