गुन्हा दाखल होताच पाच तासांच्या आत दुचाकी चोर जेरबंद

कुमठा नाका येथील क्रीडासंकुल येथून दुचाकी चोरीला गेली होती. शास्त्रीनगर पोलीस चौकीतील पोलिसांनी गुन्हा दाखल होताच पाच तासाच्या आतच तीन संशयित चोरांना अटक करून चोरलेली दुचाकी हस्तगत केली आहे.

सोलापूर -शहरातील सदर बजार पोलीस ठाण्याच्या हद्दीमध्ये कुमठा नाका येथील क्रीडासंकुल येथून दुचाकी चोरीला गेली होती. शास्त्रीनगर पोलीस चौकीतील पोलिसांनी गुन्हा दाखल होताच पाच तासाच्या आतच तीन संशयित चोरांना अटक करून चोरलेली दुचाकी हस्तगत केली आहे.

5 ऑगस्टला सागर गव्हाणे( वय 30 रा दहिटने, सोलापूर) हे कुमठा नाका येथील क्रीडा संकुल येथे आले होते. परंतु, दुचाकी पार्क करताना ते गाडीची चावी काढण्याचे विसरले होते. याचाच फायदा घेत, चोरट्यांनी दुचाकी लंपास केली. त्यांनतर 6 ऑगस्टला दुपारी 3 वाजण्याच्या सुमारास सागर गव्हाणे यांनी सदर बजार पोलीस ठाण्यात दुचाकी वाहन चोरी गेल्याची तक्रार दाखल केली.

सदर बझार पोलीस ठाण्याअंतर्गत शास्त्री पोलीस चौकीच्या पीएसआय अल्फाज शेख यांनी तपासाची चक्रे फिरवली. गुप्त माहितीदाराकडून माहिती मिळवली. त्यावेळी हिरव्या रंगाची मेस्ट्रो दुचाकी घेऊन संत तुकाराम चौकात एक व्यक्ती फिरत असल्याची माहिती पोलिसांना मिळाली.

गुन्हा दाखल झाल्या दिवशी 6 ऑगस्ट रोजी संध्याकाळी दोन तासांच्या आतच संत तुकाराम चौकात जाऊन पोलिसांनी विना नंबर प्लेट असलेली दुचाकी घेऊन संशयित फिरणाऱ्या व्यक्तीस ताब्यात घेतले. त्याला विश्वासात घेऊन अधिक विचारपूस केले असता, त्याने बाळकृष्ण मलेशाम पोलू(वय 29 रा बापूजी नगर, सोलापूर) असे नाव सांगितले. तसेच दोन साथीदारांमार्फत कुमठा नाका येथील क्रीडा संकुल येथून ही दुचाकी चोरल्याची कबुली दिली. पोलिसांनी तत्काळ

कमलकिशोर अनिल यरझल(वय 29 रा, स्वागत नगर, सोलापूर) व विशाल हरी माने(वय 23 वर्ष रा स्वागत नगर, सोलापूर)या दोघांना अटक केले.

गुन्हा दाखल होताच दोन तासांच्या आत पहिल्या आरोपीला अटक केले. तर दुसऱ्या दोन्ही संशयित चोरट्याना पाच तासांच्या आत जेरबंद करण्यात पोलिसांना यश आले आहे. ही कारवाई पोलीस उपनिरीक्षक अल्फाज शेख, पोलीस नाईक करीम शेख,पोलीस शिपाई गणेश कानडे,पोलीस शिपाई प्रवीण जाधव आदींनी केली आहे.