Koregaon Bhima Violence : कोरेगाव भीमा हिंसाचार प्रकरणी विश्वास नांगरे पाटील यांचीही होणार चौकशी

कोरेगाव भीमा येथील हिंसाचार प्रकरणी (Koregaon Bhima Violence) पुण्याच्या माजी पोलीस आयुक्त रश्मी शुक्ला (Rashmi Shukla) या आज चौकशीसाठी चौकशी आयोगासमोर हजर झाल्या होत्या. या प्रकरणात आयोग आता तत्कालीन कोल्हापूर परिक्षेत्राचे महासंचालक विश्वास नांगरे पाटील (Vishwas Nangre Patil) यांना चौकशीसाठी बोलावण्यात येणार आहे.

पुणे - कोरेगाव भीमा येथील हिंसाचार प्रकरणी (Koregaon Bhima Violence) पुण्याच्या माजी पोलीस आयुक्त रश्मी शुक्ला (Rashmi Shukla) या आज चौकशीसाठी चौकशी आयोगासमोर हजर झाल्या होत्या. तब्बल सहा तासांहून अधिक शुक्ला यांची चौकशी सुरू होती. या प्रकरणात आयोग आता तत्कालीन कोल्हापूर परिक्षेत्राचे महासंचालक विश्वास नांगरे पाटील (Vishwas Nangre Patil) यांना चौकशीसाठी बोलावण्यात येणार आहे, अशी माहिती सरकारी वकील शिशिर हिरे यांनी दिली.

• पुढील कामकाज मुंबई येथे 21 ते 25 फेब्रुवारीला सुरू होणार-

कोरेगाव भीमा येथे हिंसाचाराची घटना घडली त्यावेळी विश्वास नांगरे पाटील हे कोल्हापूर परिक्षेत्राचे महासंचालक होते. या प्रकरणात चौकशीसाठी त्यांनाही बोलावण्यात यावे असा अर्ज आयोगाचे वकील आशिष सातपुते यांनी आयोगापुढे सादर केला आहे. विश्वास नांगरे पाटील यांच्या पुराव्याचे प्रतिज्ञापत्र द्यावे या संदर्भातील आदेश आयोगाकडून देण्यात आले आहेत, असे देखील यावेळी वकील हिरे यांनी सांगितले आहे. आयोगाचे पुढील कामकाज मुंबई येथे 21 ते 25 फेब्रुवारी दरम्यान सुरू होणार आहे. चौकशीत रश्मी शुक्ला यांना विचारण्यात आलेल्या प्रश्नांची त्यांनी उत्तरे दिली असल्याचेही वकिलांनी सांगितले.

• परमबीर सिंग यांनाही समन्स बजावण्यात आला होता -

दरम्यान, कोरेगाव भीमा येथील हिंसाचारानंतर राज्य सरकारने या प्रकरणी कोलकाता हायकोर्टाचे निवृत्त मुख्य न्यायाधीश जे. एन. पटेल यांच्या अध्यक्षतेखाली आणि महाराष्ट्राचे माजी मुख्य सचिव सुमित मलिक यांच्या नेतृत्वाखाली चौकशी आयोग नेमला आहे. या आयोगाकडून सध्या रश्मी शुक्ला यांची साक्ष नोंदवली जात आहे. मुंबईचे माजी पोलीस आयुक्त परमबीर सिंग यांनाही समन्स बजावण्यात आला होता. परंतू, ते हजर झाले नाहीत. हिंसाचारावेळी सिंग हे अतिरिक्त पोलीस महासंचालक (कायदा व सुव्यवस्था) या पदावर होते. शुक्ला यांनी मात्र आयोगासमोर हजेरी लावली. तसेच शपथपत्र दाखल करण्यासाठी वेळ मागितला. यासाठी पुणे पोलिसांकडून काही कागदपत्रे मिळणे बाकी असल्याचे यावेळी त्यांनी आयोगापुढे सांगितले होते.

• काय आहे प्रकरण?

पुणे जिल्ह्यातील कोरेगाव भीमा या ठिकाणी विजयस्तंभ आहे, जो आंबेडकरी जनतेसाठी प्रेरणास्थान असून दरवर्षी १ जानेवारी रोजी या ठिकाणी लाखोंच्या संख्येने जनता अभिवादनासाठी येते. दरम्यान, ज्या ऐतिहासिक लढाईच्या स्मरणार्थ हा स्तंभ उभारला, त्या लढाईला १ जानेवारी २०१८ रोजी २०० वर्षे पूर्ण झाल्यानिमित्त या ठिकाणी मोठा जनसमुदाय लोटला होता. याचवेळी या ठिकाणी हिंसाचार उसळला होता.