पुण्यात आजपासून अनलॉक सुरू; पीएमपीएमएल प्रवासी सेवा सर्वांसाठी खुली

मागील दोन महिन्यांपासून लॉकडाऊन असलेले पुणे आजपासून पुन्हा एकदा खुले झाले आहे. शहरातील सर्व प्रकारची दुकाने, रेस्टॉरंट, हॉटेल, जिम, स्पा, सलून, उद्याने सर्वसामान्य नागरिकांसाठी खुले करण्यात आले आहेत. याशिवाय पुणे शहराच्या वाहतुकीची कणा असलेली पीएमपी ही देखील प्रवाशांच्या सेवेत आजपासून रुजू झाली आहे.

पुणे- शहरातील कोरोनाबाधित रुग्णांचा दर आणि ऑक्सिजन खाटांच्या उपलब्धतेचे प्रमाण पाहता पुणे शहराचा अनलॉकच्या तिसऱ्या टप्प्यात समावेश करण्यात आला आहे. या टप्प्यामध्ये मागील दोन महिन्यांपासून बंद असलेली अनेक दुकाने सुरू करण्यासाठी परवानगी देण्यात आली आहे. महापालिका आयुक्त विक्रमकुमार यांनी आणि त्याबाबत आदेश काढले आहेत. तसेच पुणेकरांच्या प्रवासी वाहतुकीचा कणा असलेली बससेवाही आजपासून सुरू करण्यात आली आहे.

मोजक्याच ग्राहकांना प्रवेश

मागील दोन महिन्यांपासून बंद असलेले हॉटेल सुरू झाल्यामुळे आज सकाळपासूनच ग्राहकांनी हॉटेलमध्ये गर्दी केल्याचे चित्र पाहायला मिळाले. हॉटेल मालकांनीही अनलॉकसाठी तयारी केली होती. हॉटेलमधील टेबल-खुर्ची यांची स्वच्छता, संपूर्ण हॉटेलचे सॅनिटायझेशन करून हॉटेल ग्राहकांच्या स्वागतासाठी सज्ज होते. 50 टक्के क्षमतेने सुरू असणाऱ्या हॉटेलमध्ये मोजक्याच ग्राहकांना प्रवेश देण्यात येत आहे. याचबरोबर लॉकडाऊन काळात पुणे शहर व परिसरात पीएमपीएमएलची प्रवासी सेवा पूर्णत: बंद होती. मात्र, आजच्या अनलॉकमध्ये बस प्रवासी वाहतुकील परवानगी देण्यात आली आहे. त्यामुळे पुणेकरांना एक मोठा दिलासा मिळाला आहे.

पुणे शहरातील रुग्णसंख्या घटली

मागील काही दिवसांपासून पुणे शहरातील रुग्णसंख्या झपाट्याने कमी झाली आहे. सातत्याने घटणाऱ्या रुग्ण संख्येमुळे शहरातील नागरिकांना एक प्रकारे दिलासा मिळत आहे. मागील काही दिवसांपासून शहरातील नव्याने आढळणाऱ्या कोरोनाबाधित रुग्णांची संख्या 500 च्या आत आहे. पुणे शहरात रविवारी 297 नवीन रुग्ण सापडले. तर बऱ्या झालेल्या रुग्णांची संख्या 549 इतकी आहे. याशिवाय दिवस भरात 16 कोरोनाबाधित रुग्णांचा मृत्यू झाला आहे. सद्यस्थितीत पुण्यातील सक्रिय रुग्णसंख्या चार हजार 295 इतकी आहे.

हेही वाचा -औरंगाबाद शहर आजपासून अनलॉक, ग्रामीण भागात मात्र नवे निर्बंध